STÚFUR YRKIR OG TVISTAR UM LEIÐ

Einn vinsælasti jólasveinn síðari ára er án efa stubburinn Stúfur. Hann tvistaði milli landshorna í alla nótt enda þekktur tvistari já nú þarf Sæmi Rokk að fara að æfa sig. Þó nóttin hafi verið erfið er Stúfur hress og kátur og ætlar hann að mæta í Tjöruhúsið á Ísafirði á morgun, laugardag, og sprella með bræðrum sínum í jólaleikritinu Jólasveinar Grýlusynir. Ekki nóg með það heldur ætlar hann líka að vera í leikhúsinu á sunnudag og hefjast báðar sýningar kl.14.00. Miðasala er á heimasíðu Kómedíu www.komedia.is Stúfur hefur samið nýja vísu og þar kemur margt óvænt í ljós einsog lesa má hér:

STÚFUR

Ég er jólasveinn og heiti Stúfur

og ég er alveg einstaklega ljúfur. 

Ég læt nú ekki mikið á mér bera

en samt er ég þó ýmislegt að gera. 

Þótt ég sé smár er margt mér lagt til lista,

ég kann til dæmis feiknavel að tvista.

Þá beygi ég mig örlítið í hnjánum

og teygi síðan vel úr öllum tánum.  

Um leið og jólatjútt – og tvist ég heyri,

þá tvista ég og allt um kollinn keyri.

Já ég er nú meiri KALLINN! 

Í Grýluhelli heppilegt það er

hversu lítið þar fer fyrir mér.

Ef einhver missir tölu undir borðið

þá beinist næstum alltaf til mín orðið:

,,Stúfur litli viltu hjálpa mér”?

Það er segin saga, - þá undir borð ég fer.

 

GILJAGAUR YRKIR MEÐ KROSSLAGÐA FÆTUR

Giljagaur er kominn í bæinn og hafði í mörg horn að líta í nótt. Það kom sér heldur betur vel í nótt að hann gat notað sinn góða hæfileika að skoppa um einsog gormur einsog hann segir í kvæðinu sínu. Giljagaur er ein af 13 stjörnum jólaleikritsins Jólasveinar Grýlusynir sem sýnt er um helgar á Ísafirði við miklar vinsældir. Næstu sýningar eru á laugardag og sunnudag og hefjast kl.14.00 miðasala er á heimasíðu Kómedíu www.komedia.is Jólasveinastjarnan í dag er Giljagaur og hér kemur vísan hans:

GILJAGAUR

Giljagaur heiti ég

með krosslagða fætur

fætur sem ég hef

hef dásamlegar mætur.

Um gilin ég hoppa

án þess að stoppa,

um fyrnindi og fjöllin,

- heilsa upp á tröllin.

Til bæja ég held

hvert einasta kveld

dagana fyrir jólin

þegar sólin, blessuð sólin

er sest á bak við hólinn.

Giljagaur heiti ég

og er eins og gormur.

Gormur sem snýst

eins og endilangur ormur.

Ferðast í stuði

en stundum þó með puði

upp klungur og kletta

og stundum er að detta.

Til bæja ég held

hvert einasta kveld

dagana fyrir jólin

þegar sólin, blessuð sólin

er sest á bak við hólinn.

STEKKJASTAUR HEFUR SAMIÐ NÝJA VÍSU

Hann er mættur hinn langi jólasveinn sem nefndur er Stekkjastaur og er væntanlega nokkuð lúinn þegar þetta er ritað eftir að hafa sett í ég veit ekki hvað marga skó í nótt. Stekkjastaur hefur samið nýja vísu en til þessa hefur aðallega ein vísa verið í umræðunni en það er að sjálfsögðu klassíkerinn sem hefst á þessum orðum ,,Stekkjastaur kom fyrstur...." eftir Jóhannes úr Kötlum. Stekkjastaur hefur samið nýa vísu og hefur flutt hana með miklum bravúr í leikritinu Jólasveinar Grýlusynir hjá Kómedíuleikhúsinu. Hér kemur vísa Stekkjastaurs:

STEKKJASTAUR

Svakalega er ég orðinn langur!

Hann reynir líka á mig þessi gangur,

að bera búkinn efst á þessum fótum

- svona ljótum!

Tærnar á mér teygjast fram í spíss,

sem getur verið gott við klifur íss,

og skeggið hlýjar minni hvössu höku.

Þó vandast málið ef ég borða köku,

ef hrekkur mylsna oní lúsug hárin

þá segi ég í hálfum hljóðum - fjárinn!

Svo sting ég upp á því við gamla brýnið (hana Grýlu)

að þvo og snyrta á mér greppitrínið (ég í fílu!).

 Stekkjastaur orðinn svaka langur eftir langan gang.

KERTI SPIL OG SKATA Á AÐFANGADAG Á GUFUNNI

Kómedíuleikarinn og Jóna Símonía Bjarnadóttir verða með sérvestfirskan jólaútvarpsþátt á Rás eitt á aðfangadag kl.11.03. Í þættinum munu þau fjalla um jólin fyrir vestan frá ýmsum hliðum sagt verður frá jólasiðum, lesin jólaljóð vestfirskra skálda og hlustendur heyra af jólum þriggja vestfirskra listamanna. Sagt verður frá síðustu jólum Guðmundar Thorsteinssonar eða Muggs einsog hann er betur þekktur einnig frá jólahaldi Skáldsins á Þröm og Jakobínu Sigurðardóttur. Jólatónlistin verður á sínum stað og verður hún sótt í tvær af vinsælustu jólaplötum Íslendinga. Já alveg rétt það eru skífur Þrjú á palli og þeirra Vilhjálmssystkina. Jólaþátturinn Kerti, spil og skata verður síðan endurfluttur laugardaginn 29. desember.

 Leikin verða lög eftir þessari frábæru jólaplötu í þættinum Kerti, spil og skata á aðfangadag á gömlu gufunni.

TIL HAMINGJU ERLENDUR ÉG MEINA INGVAR

Frábært að heyra að góðu mati dómnefndar einu sinni en oftar er ekki eru nú þessar verðlaunaafhendingar til vandræða. En hér er réttur maður verðlaunaður. Ingvar E. túlkaði hinn sögufræga Erlend með miklum brávúr og vonandi verður framhald á því. Ég vildi gjarnan sjá söguna Synir duftsins á tjaldinu en það er uppáhalds Erlendar bókin mín. Enn og aftur til hamingju Ingvar.

Ingvar fékk Napapijri-verðlaunin fyrir Erlend

UPPSELT Á JÓLASVEINA GRÝLUSYNI Á MORGUN

Það er góður gangur á Kómísku sveinunum frábær aðsókn var á sýningar helgarinnar og vel pantað á næstu sýningar. Uppselt er á sýningu á morgun, þriðjudag, en næstu sýningar eru um helgina og verður sýnt bæði laugardag og sunnudag kl.14.00 báða dagana. Jólasveinarnir eru svo kátir að þeir hafa ákveðið að skella á einni aukasýningu á ævintýrinu sínu. Auksýning verður korter fyrir jól eða laugardaginn 22. desember kl.14.00. Sala á aukasýninguna er hafin hér á heimasíðu Kómedíuleikhússins www.komedia.is einnig er miðasala í fullum gangi á aðrar sýningar. Allir í jólaleikhús.

 

ÞETTA MUNDI GRÝLA ALDREI KAUPA GILT

Það er greinilega allt gert til að komast í bók herra Gunnars en er þetta nú ekki full örvæntingafullt og varla er þetta gilt. Hálf berir sveinar, flestir nýrakaðir sumum vex reyndar ekki skegg þar sem sveinarnir eru konur svosem allt gott um það jafnréttið ofar öllu og maður þorir varla að segja nokkuð meir né hætta sér útí þá sálma svona rétt fyrir jól. Gæti þá bara lent í jafnréttisgrýlunni. En eitt er víst ef Grýla hefði séð þetta hefði hún tekið fram vöndinn sinn fræga fyrir útlitið á sínum sveinum. Þar að auki færi þetta nú ekki í neina metabók hjá henni heldur frekar í svörtubókina. En það verður nú að hafa gaman og framtakið er skondið ég meina gifting og alles.

13 þúsund jólasveinar

HVAR ERU JÓL?

Hér kemur annað vestfirskt jólaljóð eftir ísfirsku fjöllistakonuna Steingerði Guðmundsdóttur. Ljóðið heitir Hvar eru jól?

HVAR ERU JÓL?

Hvar eru jól - mín jarðheimsvitund spyr -

jólaljós er hjarðmenn þekktu fyrr?

Hvar sá friður er færði nóttin hljóð -

fögnuður við engla hörpuljóð?

Hvar eru gull sem gleðja lítið barn

er grátið ráðvillt flýr um eyðihjarn?

Hvar sú hönd er höfug þerrar tár

af hrjúfri ellibrá og mýkir sár?

Hvar - spyr mín vitund - sprettur jólarós

ef sprengjur verða mannsins trúarljós?

JÓLALJÓÐ EFTIR JÓN ÚR VÖR

JÓL

Jól,

kertaljós í bláum fjarska,

bak við ár,

æskuminning um fegurð.

Stíg ég hreinn upp úr bala

á eldhúsgólfinu,

signdur af þreyttri móður

færður í nýja skyrtu. 

Jól,

fagnaðartár fátæks barns –

MENNINGARRÁÐ VESTFJARÐA STYRKIR KÓMEDÍULEIKHÚSIÐ

Það var mikil hátíðarstund í lista- og menningarsögunni á Vestfjörðum í dag þegar nýstofnað Menningarráð Vestfjarða úthlutaði styrkjum í fyrsta sinn. Athöfnin var haldin í Náttúrugripasafninu í Bolungarvík og var mikil eftirvænting í lofti þegar þessi fyrstu menningarúrslit voru kynnt. 20 millur voru til úthlutunnar fyrir verkefni sem unnin hafa verið á þessu ári eða eru á framleiðslustigi. Kómedíuleikhúsið datt heldur betur í lukkupottinn og fékk styrki vegna fimm verkefna: Act alone leiklistarhátíð 2007, Jólasveinar Grýlusynir, Ég bið að heilsa og fyrir hljóðbækurnar tvær Þjóðsögur úr Vesturbyggð og Þjóðsögur úr Ísafjarðarbæ. Kómedíuleikhúsið þakkar Menningarráði kærlega fyrir ómetanlegt framlag til þessara verkefna. Kemur þetta að mjög góðum notum þar sem listastarfsemi kostar alltaf slatta af monnípeningum og bara það að ná á núllið fræga við hvert verkefni er frábær árangur. Stofun Menningarráðs Vestfjarða er mikill fengur fyrir listalífið á Vestfjörðum og mun efla enn frekar það öfluga menningarstarf sem þegar er. Enn og aftur kærar þakkir til Menningarráðs Vestfjarða.

Hljóðbókin Þjóðsögur úr Vesturbyggð fékk styrk frá Menningarráði.

P.s. Hljóðbókin fæst á vef Kómedíu www.komedia.is ásamt hljóðbókinni Þjóðsögur úr Ísafjarðarbæ.