Act alone 12. - 14. ágúst Ísafirði og Arnarfirði

Leiklistarhátíðin Act alone verður haldin áttunda árið í röð dagana 12. – 14. ágúst. Hátíðin fer að vanda fram á Ísafirði sem gárungarnir nefna Einleikjabæinn þegar hátíðin fer fram ár hvert. Eru það orð að sönnu því mikið fjör er í bænum Act alone helgina en auk þess hefur Kómedíuleikhúsið sem einmitt er staðsett í bænum verið duglegt við að setja upp einleiki síðasta áratug. En í ár verður Act alone ekki bara á Ísafirði heldur einnig í Arnarfirði, nánar tiltekið á höfuðbóli Vestfjarða, Hrafnseyri. Rétt er að geta þess að aðgangur að öllum sýningum á Act alone er ókeypis einsog verið hefur frá upphafi. Dagskrá Act alone 2011 er sérlega vönduð og fjölbreytt og náttúrulega einleikin. Boðið verður uppá fjölmarga innlenda leiki og einn erlendan gestaleik. Í gegnum árin hafa margir erlendir einleikarar komið fram á Act alone og að þessu sinni mun sýning frá Noregi verða í aðalhlutverki. Leikurinn nefnist The Whole Caboodle með leikkonunni Sara Margrethe Oskal og er opnunarsýning Act alone í ár. Listakonan er Sami og hefur verið að vinna með eigin sagnarf í sinni list með því að segja frá sögu, hjátrú og fjölbreyttan sagnaarf Sama. Sýningin er á ensku og hefur verið sýnd víða um heim. Átta innlendir einleikir verða á dagskrá Act alone í ár sem sýnir um leið hve öflugt einleikjaformið er á Íslandi í dag. Nýjasti einleikur þjóðarinnar Skjaldbakan með Smára Gunnarssyni verður sýndur á fyrsta degi Act alone og einnig mun prinsessan á Bessastöðum koma í opinbera heimsókn á Ísafjörð. Nemendur í Leikfélagi Flensborgarskóla hafa verið að vinna með einleikjaformið síðustu misseri og munu sýna úrval stuttra einleikja. Á öðrum degi Act alone verða þrír einleikir sýndir og hefst dagurinn með leiknum Beðið eftir gæsinni eftir Ásgeir Hvítaskáld. Ragnheiður Bjarnason sýnir dansverkið Kyrrja og Lilja Katrín Gunnarsdóttir flytur leik sinn Mamma ég!. Einnig verður opin æfing á einleiknum Hvílíkt snildarverk er maðurinn! sem verður frumsýndur í haust með leikaranum Sigurði Skúlasyni. Á lokadegi hátíðarinnar flyst dagskráin yfir á Hrafnseyri í Arnarfirði. Þar verður sýndur sögulegi einleikurinn Bjarni á Fönix og hátíðinni lýkur síðan með einleiknum Jón Sigurðsson strákur að vestan sem var sérstaklega samin í tilefni af 200 ára afmæli þjóðhetjunnar. Dagskrá Act alone 2011 og allar upplýsingar um hátíðina má finna á heimasíðunni www.actalone.net

Dagskrá ACT ALONE 12. - 14. ágúst Ísafirði og Arnarfirði

Ein flottasta listahátíð landsbyggðarinnar ACT ALONE verður haldin áttunda árið í röð dagana 12. - 14. ágúst. Hátíðin fer að vanda fram í Einleikjabænum Ísafirði en einnig verða sýningar á Hrafnseyri í Arnarfirði. Rétt er að taka það sérstaklega fram að aðgangur að öllum sýningum hátíðarinnar er ókeypis. En þannig hefur það reyndar verið allt frá upphafi. Þannig að nú er bara að vippa sér í Einleikjabæinn og njóta einstakrar hátíðar. Hér er dagskrá ACT ALONE:

Dagskrá ACT ALONE 2011
12. – 14. ágúst á Ísafirði og Arnarfirði
Aðgangur að öllum sýningum ACT ALONE er ókeypis

Föstudagur 12. ágúst

Silfurtorg Ísafirði
Kl.15.00 Prinsessan á Bessastöðum: Opinber heimsókn á Ísafirði
Leikari: Þórunn Arna Kristjánsdóttir

Prinsessan er búin að ferðast um allt Ísland með forsetanum í sumar og nú er komið að Ísafirði. En núna er hún búin að týna forsetanum! Hvar gæti hann verið? Ætli hann hafi tjaldað upp í Naustahvilft? Sé að gæða sér á góðgæti í bakaríinu? Eða er hann hreinlega upp í skýjunum? Hjálpið prinsessunni að finna forsetann, dansið og syngið að vild, þetta verða sko fálkaorður og fjör!

Edinborgarhúsið Ísafirði
Kl.17.00 Röð stuttra einleikja
Leikarar: Leikfélag Flensborgar
Leikstjórn: Eyrún Ósk Jónsdóttir, Erna Ómarsdóttir

Leikfélag Flensborgar hefur verið a vinna með einleikjaformið síðasta árið og munu nokkrir meðlimir leikfélagsins sýna einleiki á Act alone. Einleikirnir verða sýndir hver á eftir öðrum og tekur hver sýning 5-10 mínútur. Einleikirnir eru spuna verk, skrifaðir eða stílfærðir af krökkunum sjálfum. Þeir eru mjög mismunandi: grínleikir, harmleikir, abstrakt dans og súríalismi.

Edinborgarhúsið Ísafirði
Kl.20.00 The Whole Caboodle
Leikari/Höfundur: Sara Margrethe Oskal
Sýningartími: 80 mín

Einleikurinn The Whole Caboodle byggir á hinni gömlu hirðfíflahefð. Hirðfíflið grefur upp óþægileg mál, kemur upp um hluti sem þarf að gagnrýna og dregur fram í dagsljósið það sem er hulið. Oskal hefur tekið hefðbundnar gamansögur, sögusagnir og “joiks” (gömul finnsk sönghefð) og skapað úr þeim þrjár nútímapersónur: Maidie, hreindýrið og ömmuna. Þessar persónur eru gæddar miklum tilfinningaþunga og hafa öll mikilvæga sögu að segja. Það hefur verið níðst á þeim og þau niðurlægð en á sviðinu kemur hirðfíflið upp í þeim. Þau byrja í tapliðinu en enda sem sigurvegarar.
Oskal flytur verk sitt á minnihluta tungumálinu, Sami, en hefur þróað með sér þann hæfileika að komast yfir tungumálaþröskuldinn. Eins og töframaður þýðir hún stanslaust, línu fyrir línu, brandara eftir brandara, yoik eftir yoik með hjálp Power Point. Þessi þýðingaraðferð er algerlega samofin sýningunni og er í sjálfu sér orðið listrænt tæki. Það virkar sem galdrar og þeir tilheyra hlutverkum hirðfíflsins. Þannig má segja að þetta nútímalega Sama hirðfífl geti spunnið, haft stjórn á tímasetningum á sviðinu OG haft raunveruleg samskipti við áhorfendur á hvaða tungumáli sem er: Íslensku?

Edinborgarhúsið Ísafirði
Kl.22.00 Skjaldbakan
Leikari: Smári Gunnarsson
Höfundar: Árni Grétar Jóhannsson, Smári Gunnarsson
Leikstjórn: Árni Grétar Jóhannsson
Sýningartími: 55 mín

Skjaldbakan er gamansamur einleikur byggður á þeim sannsögulega stóratburði þegar risaskjaldbaka kom að landi á Hólmavík árið 1963 og upphófst mikið fjölmiðlafár.
Ungur maður kynnist veiðimanninum og þótt þeir fari í sitt hvora áttina þá eru á milli þeirra órjúfanleg tengsl. Veiðimaðurinn tekur loforð af hinum unga manni að passa upp á bát fyrir sig þegar hann flytur frá þorpinu. Þegar báturinn dúkkar upp aftur mörgum árum seinna og minningar um veiðimanninn og skjaldbökuna sem hann dró að landi streyma fram þá koma fram leyndir draumar hins unga manns um veiðimennsku, sjómennsku og almenna karlmennsku. Allt kristallast þetta auðvitað í einu merkasta afreki veiðimannsins, skjaldböku ævintýrinu.

Laugardagur 13. ágúst

Edinborgarhúsið Ísafirði
Kl.14.00 Beðið eftir gæsinni
Leikfélagið Frjálst Orð
Leikari: Jón Gunnar Axelsson
Höfundur/Leikstjórn: Ásgeir Hvítaskáld
Sýningartími: 18 mín

Beðið eftir gæsinni er einleikur eftir Ásgeir Hvítaskáld. Jón leikur örvæntingafulla veiðimanninn sem hræðist mest af öllu að vera kallaður einnar gæsar veiðimaður. En gæsin er slunginn og hefur áhrif á hugarheim veiðimannsins. Bráðfyndið og kaldhæðið.

Edinborgarhúsið Ísafirði
Kl.15.00 Kyrrja
Flytjandi/Hugmyndahöfundur: Ragnheiður Bjarnarson
Höfundur texta: Snæbjörn Brynjarsson
Tónlist: Jóhann Friðgeir Jóhannsson
Lýsing: Stefán Benedikt Vilhelmsson
Sýningartími: 50 mín

Skynjum við litbrigði martraða?
björt sem mjöll
rjóð sem rós
tinnusvört

Komdu á vit ævintýranna -
og ef þú rýnir vel gæturðu séð engla...
Tilgangur verksins er að rannsaka munin á milli góðs og ills.
Kanna hvað hugtökin himnaríki og helvíti standa fyrir og hvort það sé nauðsynlegt að hafa einn heim af hinu góða og annan af hinu illa/vonda.
Er tvískiptur heimur nauðsynlegur til að skilja jafnvægið á milli þeirra?
Eru hinir samfélagslega illu eins vondir og við viljum halda?
Eru þeir illu að reyna að fá okkur til að horfast í augu við okkur sjálf?
Hvað kraumar undir hinu góða yfirborði?
Hvað gerist ef prinsessan deyr?

Edinborgarhúsið Ísafirði
Kl.17.00 Verk í vinnslu – Opin æfing á Shakespeare
Leikari: Sigurður Skúlason
Leikstjórn: Benedikt Árnason
Sýningartími: 90 mín

Í október n.k. verður frumsýndur einleikurinn Hvílíkt snilldarverk er maðurinn! byggður á höfundarverki Williams Shakespeare eftir leikarann Sigurð Skúlason og leikstjórann Benedikt Árnason. Þessi sýning er hugsuð sem þakkaróður til leiklistarinnar og þess besta sem hún hefur af sér alið: verka leikskáldsins Williams Shakespeares.
Sýningin er byggð á brotum úr verkum Shakespeares og fjallar um manninn og vegferð hans frá vöggu til grafar og skyldleika lífs og leikhúss af því innsæi og listfengi sem Shakespeare einum er lagið! – í þýðingu Helga Hálfdanarsonar.

Edinborgarhúsið Ísafirði
Kl.21.00 Mamma, ég
Höfundar: Lilja Katrín Gunnarsdóttir, Svanur Már Snorrason
Leikari: Lilja Katrín Gunnarsdóttir
Framleiðandi/Tæknitröll: Stefán Benedikt Vilhelmsson
Leikstjórn: Ástbjörg Rut Jónsdóttir
Sýningartími: 50 mín

Hér er á ferð gamansamur einleikur eftir nýbakaða móður um meðgöngu, fæðingu og sjálft móðurhlutverkið. Lilja Katrín var með lífið planað. Hún ætlaði aldrei að vera mamma enda miklu skemmtilegra að djamma, djúsa og fara í skemmtistaðasleiki á sóðalegum börum....En lífið henti Lilju út í djúpu laugina eitt vorkvöld í Köben. Hún varð ólétt eftir einnar nætur gaman og eftir miklar hugleiðingar fram og til baka ákvað hún að eignast barnið. Það var hægara sagt en gert. Lilja komst að því að það var ótal margt sem hún hafði ekki hugmynd um um meðgönguna því enginn hafði sagt henni það. Konur tala ekki um gyllinæð, þvagleka, skeggvöxt og bjúg heldur einblína á að meðgangan, fæðing og það að verða mamma sé bara frábært, æðislegt og meiriháttar - sem það er vissulega. En ekki alltaf.
Hér er á ferð einleikur sem allir geta haft gaman að - hvort sem það eru óléttar konur, ömmur, afar, bræður, systur, mömmur, pabbar og allir þeir sem hafa hugleitt barneignir eða þekkja einhvern sem hefur gengið í gegnum þetta ferli.
Komið með í ferðalag um ævintýraheima bleyjuskipta, ungbarna, brjóstagjafar og ælubletta.

Sunnudagur 14. ágúst

Hrafnseyri Arnarfirði
Kl.13.30 Bjarni á Fönix
Kómedíuleikhúsið
Leikari: Ársæll Níelsson
Höfundar: Ársæll Níelsson, Elfar Logi Hannesson
Búningar/Leikmunir: Marsibil G. Kristjánsdóttir
Leikstjórn: Elfar Logi Hannesson
Sýningartími: 40 mín

Skipherrann Bjarni Þorlaugarson á skútunni Fönix háði frækinn bardaga við hátt í 30 Fransmenn um miðja nítjándu öld. Bardaginn stóð yfir í heila fjóra klukkutíma, að vísu tóku menn sér stutta pásu í miðjum átökum, og gekk Bjarni óskaddaður af vettvangi. Skömmu síðar fannst sjórekið lík af einum Fransmanni og voru uppi kenningar um að Bjarni hafi orðið hans bani. Mál var dómtekið og þurfti Bjarni þá að spyrja sig þeirrar samviskuspurningar: Drap ég mann eða drap ég ekki mann? Sagan af Bjarna skipherra á Fönix er sönn vestfirsk hetju og þroskasaga. Í þessu leikriti skiptast á ástir og átök úr íslenskum raunveruleika.
Bjarni á Fönix er kraftmikil sýning sem lætur engan ósnortinn.

Hrafnseyri Arnarfirði
Kl.15.00 Jón Sigurðsson strákur að vestan
Kómedíuleikhúsið
Leikari/Höfundur: Elfar Logi Hannesson
Leikmynd/Búningar: Marsibil G. Kristjánsdóttir
Leikstjórn: Ársæll Níelsson
Sýningartími: 45 mín

Sómi Íslands sverð og skjöldur. Frelsishetjuna Jón Sigurðsson frá Hrafnseyri þekkja allir og þá einkum afrek hans í Danaveldi. En hver var Jón Sigurðsson og hvaðan kom hann? Hvað var það sem mótaði hann og gerði hann að öflugum talsmanni þjóðarinnar? Í þessu verki fáum við að kynnast piltinum Jóni Sigurðssyni og æskuárum hans á Hrafnseyri í Arnarfirði.
Verkið er sérstaklega samið í tilefni af 200 ára afmæli Jóns Sigurðssonar og var frumsýnt á afmælisdegi hans þann 17. júní á Hrafnseyri.

Hátíðarlok – Sjáumst að ári á Act alone 2012 í ágúst

Bjarni á Fönix í Faktorshúsinu

Sögulegi einleikurinn Bjarni á Fönix verður sýndur í Faktorshúsinu á Ísafirði. Leikurinn var frumsýndur í upphafi síðasta leikárs við úrvals viðtökur. Eftir það var leikurinn sýndur víða en sökum anna hinna kómísku hafa sýningar leigið niðri um nokkurn tíma. Loksins er ævintýrið hafið að nýju og hafa verið ákveðnar tvær sýningar sem verða á hinum sögulega veitingastað Faktorshúsið á Ísafirði. Sýnt verður tvo fimmtudaga í röð og boðið uppá sérstakan leikhúsmatseðil í tengslum við sýninguna en einnig er hægt að kaupa miða bara á sýninguna. Sýningarnar verða fimmtudaginn 21. júlí og svo viku síðar 28. júlí. Miðasala er þegar hafin og fer fram í Faktorshúsinu.

Söguhetjuna Bjarna leikur Ársæll Níelsson, Elfar Logi Hannesson leikstýrir og saman eru þeir höfundar leiksins. Verkið fjallar um skipherrann Bjarna Þorlaugarson á skútunni Fönix er háði frækinn bardaga við hátt í 30 Fransmenn um miðja nítjándu öld. Bardaginn stóð yfir í heila fjóra klukkutíma, að vísu tóku menn sér stutta pásu í miðjum átökum, og gekk Bjarni óskaddaður af vettvangi. Skömmu síðar fannst sjórekið lík af einum Fransmanni og voru uppi kenningar um að Bjarni hafi orðið hans bani. Mál var dómtekið og þurfti Bjarni þá að spyrja sig þeirrar samviskuspurningar: Drap ég mann eða drap ég ekki mann?

Sagan af Bjarna skipherra á Fönix er sönn vestfirsk hetju- og þroskasaga. Í þessu leikverki skipstast á ástir og átök úr íslenskum raunveruleika. Bjarni á Fönix er kraftmikil sýning sem lætur engan ósnortinn.

Act alone 2011

Það styttist í hátíðina einleiknu í einleikjabænum Ísafirði. Act alone verður haldin dagana 12. - 14. ágúst og verður boðið uppá úrval innlendra leikja og erlendan gestaleik. Þetta er áttunda árið í röð sem Act alone er haldin en hátíðin er án efa ein flottasta listahátíð landsbyggðarinnar auk þess að vera eina einleikjahátíð landsins. Lengi vel var Act alone eina árlega leiklistarhátíðin á Íslandi en fyrir skömmu varð til önnur hátíð sem haldin er í borginni og nefnist Lókal. Að vanda verður aðgangur að öllum sýningum á Act alone ókeypis enda er þetta hátíð og mikilvægt að sem flestir geti tekið þátt í ævintýrinu. Fjölmörg fyrirtæki haft styrkt hátíðina nú sem endranær auk þess sem Menningarráð Vestfjarða setur slatta af monnípeningum til handa hátíðinni og við eigum einnig von á aurum frá Ísafjarðarbæ. Dagskrá Act alone 2011 verður birt allra næstu daga á heimasíðunni www.actalone.net En til að kitla smá má nefna að meðal sýninga á Act alone í ár er Mamma ég!, Jón Sigurðsson strákur að vestan, Bjarni á Fönix, Skjalbakan og síðast en ekki síst mun Prinsessan á Bessastöðum koma í opinbera heimsókn á Ísafjörð sem verður á sjálfu Silfurtorginu. Sýningar verða annars í Edinborgarhúsinu en á lokadegi hátíðarinnar verða sýningar á höfuðbóli Vestfjarða á Hrafnseyri við Arnarfjörð. Eitt er víst Act alone verður alveg einleikin og nú er bara að taka dagana frá (12. - 14. ágúst) og taka þátt í ævintýrinu.

Menningin og mannlífið blómstrar á Þingeyri

Það hefur verið mikið líf og fjör í þorpinu Þingeyri við Dýrafjörð síðustu vikur. Um síðustu helgi fór fram hin árlega bæjarhátíð Dýrafjarðardagar með fjölbreyttri dagskrá fyrir alla familíuna. Á mánudag hófst svo risastórt Norrænt handverknámskeið en alls tengjast 150 manns þessu námskeiði bæði nemendur og kennarar. Fjölbreytt námskeið í boði allt frá brúðugerð til eldsmíði og allt þar á milli. Lokadagur námskeiðsins er í dag og að sjálfsögðu verður gert mikið úr deginum. Í kvöld verður heljarmikil veisla á víkingasvæðinu þar sem grillaðir verða nokkrir skrokkar. Nýjasti leikhópur Vestfjarða Zurgur sýnir leikinn Dýri og félagar sem var einmitt frumsýnt á Dýarfjarðardögum og hefur verið sýnt nokkrum sinnum í vikunni við mjög góðar viðtökur. Verðlaunaleikurinn Gísli Súrsson verður einnig sýndur á Víkingasviðinu og svo eru nætur bjartar og aldrei að vita hvað gerist eftir það. Hellingur er framundan í menningunni í Dýrafirði nú í sumar og óhætt að taka undir með fornkappanum Vésteini:
Nú falla vötn öll til Dýarfjarðar.

Hafliði Magnússon - Minning

Vinur og kollega Hafliði Magnússon listamaður frá Bíldudal hefur yfirgefið sviðið. Hafliði var merkur listamaður sem hefur heldur betur puntaði uppá menningarlífið á Bíldudal í áratugi. Fjölhæfur með afbrigðum úrvals rithöfundur samdi leikrit, smásögur og skáldsögur. Hann gerði leikmyndir fyrir Leikfélagið Baldur á Bíldudal, leikstýrði og var hirðskáld leikfélagsins. Ég var svo heppinn að fá að kynnast honum og starfa með honum. Mín fyrsta minning af Hafliða er þegar ég og æskufélagi minn, Jón Sigurður, bönkuðum uppá hjá ,,Skáldinu" einsog hann er jafnan nefndur á Bíldudal. Listamaðurinn opnaði dyrina og við spurðum einfaldlega ,,megum við koma í heimsókn?". Skáldið bauð okkur inn með það sama. Bauð okkur til stofu tók fram djús og mjólkurkex. Svo hófst sögustundinn hjá skáldinu. Þvílíkur sögumaður og fróðleiksnáma sem hann var. Hann sagði okkur sögur sem flestar tengdust menningu og listum, ræddi við okkur einsog jafnoka sína - heiðarlegur og sannur maður. Loks stóð hann upp, settist við rafmagnspíanóið sitt og byrjaði að spila nokkra slagara fyrir okkur. Minnisstæðast er þegar hann lék fyrir okkur músík úr Tomma og Jenna teiknimyndunum sem voru aðalsjónvarpsefni unga fólksins í þá daga og er kannski enn. Eftir þetta átti ég oft eftir að heimsækja Skáldið og eftir því sem tíminn leið voru veitingarnar aðrar en djús. Leikfélagið Baldur á Bíldudal stóð í blóma á mínum æskuárum og þar sem faðir minn var í leikfélaginu að leika og mamma að sauma búninga fékk maður að fara með á æfingar. Þar ríkti ávallt mikil gleði og kátína og þetta skemmtilega sem fylgir leikhúsinu þar voru allir jafnir. Við púkar leikaranna vorum á öllum æfingum í þær sex vikur sem tók að undirbúa ævintýri. Og ávallt var Hafliði á æfingum að mála og smíða leikmyndir eða að leikstýra og stundum var hann höfundur leiksins líka. Þegar hlé var gert á æfingum var Hafliði jafnan hrókur alls fagnaðar enda mikill húmoristi og gleðigjafi. Seinna fékk ég að stíga á stokk með leikfélaginu og þá náttúrulega í verki eftir Hafliða. Það eru bara forréttindi að fá svona leiklistar- og menningareldskírn sem maður fékk með samstarfi við Hafliða og félaga í Leikfélaginu Baldri á Bíldudal. Svo áhrifaríkt að allar götur síðan hef ég unnið við leikhúsið og listina. Hafliða verður sárt saknað en verk hans munu lifa og minning um góðan mann. Ég sendi aðstandendum Skáldsins mínar innilegustu samúðarkveðjur.

Zurgur á Þingeyri

Það verður mikið stuð og húllumhæ á Þingeyri núna um helgina en þá fer fram hin árlega bæjarhátíð Dýarfjarðardagar. Að vanda er boðið uppá fjölbreytta dagskrá fyrir alla familíuna. Kómedíuleikhúsið sýnir m.a. verðlaunaleikinn Gísli Súrsson á útivíkingasviðinu og vinsælasta ábreiðusveit Vestfjarða Megakukl verður með megakonsert í Hallargarðinum. Síðast en ekki síst mun nýjasta leikhús Vestfjarða frumsýna sitt fyrsta verk. Leikhúsið er skipað æskunni í vinnuskólanum á Þingeyri og heitir því skemmtilega nafni Zurgur. Hver er nú það spyrja eflaust margir? Jú, Zurgur er persóna úr hinni frábæru teiknimynd Leikfangasaga og er kappi þessi faðir Bósa ljósárs. Frumsýningin verður í grillveislunni á útivíkingasvæðinu á laugardeginum. Leikurinn nefnist Dýri og félagar og fjallar um landnámsmennina fjóra í Dýrafirði. Þá Dýra, Eirík, Véstein og Þórð. Leikstjóri og höfundur er Elfar Logi Hannesson.
Sýningar á Dýri og félagar verða á dagskrá þrisvar í viku í júlí á mánudögum, þriðjudögum og fimmtudögum kl.20.30 alla dagana. Sýnt er á útivíkingasviðinu og er aðgangur að öllum sýningunum er ókeypis.

Zurgur á Þingeyri

Það verður mikið stuð og húllumhæ á Þingeyri núna um helgina en þá fer fram hin árlega bæjarhátíð Dýarfjarðardagar. Að vanda er boðið uppá fjölbreytta dagskrá fyrir alla familíuna. Kómedíuleikhúsið sýnir m.a. verðlaunaleikinn Gísli Súrsson á útivíkingasviðinu og vinsælasta ábreiðusveit Vestfjarða Megakukl verður með megakonsert í Hallargarðinum. Síðast en ekki síst mun nýjasta leikhús Vestfjarða frumsýna sitt fyrsta verk. Leikhúsið er skipað æskunni í vinnuskólanum á Þingeyri og heitir því skemmtilega nafni Zurgur. Hver er nú það spyrja eflaust margir? Jú, Zurgur er persóna úr hinni frábæru teiknimynd Leikfangasaga og er kappi þessi faðir Bósa ljósárs. Frumsýningin verður í grillveislunni á útivíkingasvæðinu á laugardeginum. Leikurinn nefnist Dýri og félagar og fjallar um landnámsmennina fjóra í Dýrafirði. Þá Dýra, Eirík, Véstein og Þórð. Leikstjóri og höfundur er Elfar Logi Hannesson.
Sýningar á Dýri og félagar verða á dagskrá þrisvar í viku í júlí á mánudögum, þriðjudögum og fimmtudögum kl.20.30 alla dagana. Sýnt er á útivíkingasviðinu og er aðgangur að öllum sýningunum er ókeypis.