LEIKLISTARRÁÐ UMDEILT

Það er ljóst að nýjasta úthlutun Leiklistarráðs hefur vakið nokkra athygli og umfjöllun í fjölmiðlum. Er meðal annars gagnrýnt hve lítill hluti styrkja rennur til sýninga fyrir börn og unglinga. Einnig vekur athygli að fjölmargir Sjálfstæðir leikhópar sem hafa starfað í nokkur ár árið um kring og byggt upp öfluga starfsemi en fá svo ekki krónu í ár. Af þeim hópum má t.d. nefna Möguleikhúsið við Hlemm sem er í eigin húsnæði sem leikhúsið hefur byggt upp síðustu ár af miklum myndarskap og er í dag fullbúið leikhús með ljósum, miðasölu og nýjum sætum. Annar sjálfstæðu leikhópur sem fær ekki neitt frá Leiklistarráði er Stoppleikhópurinn sem hefur starfað í meira en áratug og ferðast vítt og breitt um landið með sýningar sínar. Að endingu má svo nefna Kómedíuleikhúsið á Ísafirði, nema hvað þetta er nú Kómedíubloggið, sem fær að vanda kaldar kveðjur frá ráðinu sem hefur einsog greint hefur hér frá sýnt leikhúsinu lítinn áhuga allt frá stofnun. Samt er um að ræða algjöra nýsköpun enda Kómedíuleikhúsið eini sjálfstæði leikhópurinn á landsbyggðinni. Fjölmiðlar hafa hins vegar sýnt Kómedíuleikhúsinu áhuga allt frá upphafi enda hefur verið fjallað talsvert um höfnun ráðsins á leikhúsinu fyrir vestan. Eini gallinn við þessa umræðu er sá að Leiklistarráð virðist ekki ætla að tjá sig um málið og er það mjög miður. En við erum hins vegar orðin vön því - því miður.

Athugasemdir

[Pétur Eggerz (IP-tala skráð) 8.2.2008 kl. 18:43]

Það væri vissulega áhugavert ef unnt væri að fá þá sem sitja í Leiklistarráði til að taka þátt í opinberum umræðum um hvert skuli stefna. Mín reynsla eftir að hafa verið í þessum bransa í hartnær tvo áratugi er hinsvegar séu að það fer nánast aldrei fram nein umræða milli þeirra sem í ráðinu sitja og okkar sem erum að berjast í þessu alla daga. Ég minnist þess ekki að Leiklistarráð hafi nokkurn tíma haft samband til að forvitnast nánar um það sem að baki umsóknum liggur, maður þakkar fyrir ef þau láta svo lítið að koma að sjá þær sýningar sem verið er að styðja.

[Elfar Logi Hannesson (IP-tala skráð) 8.2.2008 kl. 21:21]

Einmitt þetta er málið umræðan er bara í einstefnu því Leiklistarráð vill ekki tjá sig neitt um málið. Og einmitt Leiklistarráð hefur aldrei haft samband við Kómedíuleikhúsið til að leita eftir upplýsingum og ég veit ekki hvort þeir hafi mætt í þau tvö skipti sem styrkur fékkst.

[Friðþjófur Þorsteinsson (IP-tala skráð) 9.2.2008 kl. 14:59]

Það vill svo undarlega til að það sama er uppi á teningnum hér í London. The Arts council sem styrkir reyndar alla menningartengda starfsemi (söfn, leikhús, tónleika o.s.frv.) hefur dregið úr sínum strykjum og fjölmargir leikhópar hafa misst viðurværi sitt vegna þessa. Margir hafa brugðið á það ráð að safna undirskriftum til styrktar starfi sínu og lagt fyrir ráðið sem hefur endurskoðað ákvarðanir sínar að hluta. Kannski þú ættir að bregða á það ráð, kæri vin?

Annars sendi ég baráttukveðjur utan úr heimi! Gangi þér vel með verkefnin þín! 

[Elfar Logi Hannesson (IP-tala skráð) 9.2.2008 kl. 17:02]

Nei blessaður ljóssonur leikhússins gaman að heyra frá þér, nei nei maður fer ekkert í að pára á einhverja lista - væri alveg nóg að heyra frá ráðinu í þessum skopleik og fá á hreint hver stefna þeirra er. Bestu kveðjur í úttlandið