Tímartið List á Vestfjörðum

Hið nýstofnaða Félag vestfirskra listamanna, FVL, vinnur nú að útgáfu að listatímariti. Króinn hefur fengið nafnið List á Vestfjörðum og verður í blaðinu fjallað um hina fjölbreyttu og öflugu list á svæðinu sem hún sannarlega er. Allar listir verða í aðalhlutverki myndlist, leiklist, tónlist og allt þar á milli. Hin vestfirska listaflóra er sannarlega blómleg og kröftug. Stefnt er að því að tímaritið List á Vestfjörðum komi út í lok október og verði dreift inná hvert heimili á Vestfjörðum og víðar um landsbyggðina. Tilgangur blaðsins er fyrst og fremst að kynna vestfirska listamenn sem og listalífið vestra almennt. Sérstök áhersla verður lögð á listahátíðirnar en það má teljast nokkuð skondið að fjórar slíkar eru haldnar árlega hér vestra og allar eru þær meðal flottustu listahátíða landsins. Bréf hafa verið send til allra félagsmanna FVL með ósk um að skila inn efni í blaðið. Og er ástæða til að hvetja alla til að senda inn efni í blaðið þeimum meira þeimum fjölbreyttara verður blaðið okkar. Við tökum líka á móti öllum hugmyndum um efni í blaðið og hvetjum landmenn alla til að taka þátt í ævintýrinu og senda inn hugmyndir um listrænt efni að vestan.

Já það er alveg rétt það er gott að skapa á Vestfjörðum

Gaman var að heyra í kvikmyndamógulnum í Sjónvarpinu í gær sem sagði að það væri bara svo gott að skapa og vinna á Vestfjörðum. Þetta eru nú svosem engin nýtt fyrir mér sjálfur flutti hér vestur á Ísafjörð um aldamótin með mitt Kómíska leikhús. Ekki voru nú allir á því að þetta væri sneddý að fara úr borginni og ætla að vinna sem leikari í einhverri holu fyrir vestan. En hér er ég enn og hef nóg að gera. Vissulega hafa komið tímar þar sem lítið er að gera en þá er bara eitt að gera og það er að skapa sér verkefnininn. Það er nú einhvernveginn líka hin sjálfstæða list að þú verður að skapa þér verkefnin sjálfur fáir sem bjalla í þig og bjóða þér monninga fyrir eitt stykki sköpunarverk, það kemur þó fyrir en frekar undantekning en regla. Það er ekkert plat að það er sérlega gott að vinna sem listamaður á Vestfjörðum. Hér eru allir boðnir og búnir að rétta þér hjálparhönd og sýna verkefnum þínum áhuga. Kyrrð og friður er hér líka góður. Landslagið er bara bjútí. Húsnæði til æfinga og sýninga eru útum allt af öllum stærðum og gerðum bara spurning hvað henti hverju verkefni fyrir sig best. Á Ísafirði er líka komið skemmtilegt apparat sem heitir Listakaupstaður sem er til hús í gömlu frystihúsi. Þar á efstu hæð hússins eru vinnustofur fyrir einyrkja í listinni og nýverið var komið upp gestavinnustofu sem aðkomu listamenn allsstaðar af landinu geta sótt um afnot af. Einnig geta litlir leik- og eða danshópar sótt um að æfingaaðstöðu í æfingasal Kómedíuleikhússins sem er einnig í Listakaupstað. Það er náttúrulega alveg geggjað er það ekki - að æfa sýninguna fyrir vestan og mæta svo bara með hana tilbúna í leikhúsið fyrir sunnan. Þeir sem hafa áhuga á að nýta sér aðstöðu í Listakaupstað getað sent mér línu og við göngum í dæmið. Ástæða þess að aðstæður til listsköpunar á Vestfjörðum eru svona góðar held ég að sé m.a. sú að hér stendur listin á gömlum grunni. Öflugir tónlistarskólar starfandi, áhugaleikfélög, myndlistin hefur verið öflug og fjölda sýninga haldnar ár hvert, kórastarf mjög öflugt, mikið af einyrkjum í listinni og þannig mætti lengi telja. Svo er það líka fólkið á Vestfjörðum sem er bara svo einlægt og skemmtilegt. Verið velkomin í sköpunarparadísina á Vestfjörðum.

Haustleikferð Kómedíuleikhússins - lænöppið

9. – 24. september 2011
16 sýningar 16 staðir 16 dagar

JÓN SIGURÐSSON STRÁKUR AÐ VESTAN
BJARNI Á FÖNIX
2 leiksýningar á verði einnar miðaverð aðeins 1.900.- kr

9. september föstudagur kl.20.00: Búðardalur – Leifsbúð
10. september laugardagur kl.20.00: Rif – Frystiklefinn
11. september sunnudagur kl.20.00: Grundarfjörður – Kaffi 59
12. september mánudagur kl.20.00: Drangsnes – Félagsheimilið
13. september þriðjudagur kl.20.00: Hólmavík – Kaffi Riis
14. september miðvikudagur kl.20.00: Reykhólar – Báta og hlunnindasalurinn
15. september fimmtudagur kl.20.00: Barðaströnd – Birkimelur
16. september föstudagur kl.20.00: Patreksfjörður – Sjóræningjahúsið
17. september laugardagur kl.20.00: Tálknafjörður – Dunhagi
18. september sunnudagur kl.20.00: Bíldudalur – Vegamót
19. september mánudagur kl.20.00: Ísafjörður - Hamrar
20. september þriðjudagur: Flateyri – Vagninn
21. september miðvikudagur: Suðureyri – Talisman
22. september fimmtudagur: Þingeyri - Veitingahornið
23. september föstudagur: Bolungarvík – Félagsheimilið
24. september laugardagur: Súðavík – Melrakkasetrið

16 sýningar 16 staðir 16 dagar

Kómedíuleikhúsið er nú að undirbúa haustleikferð um Vestfirði og Vesturland með tvo af sínum vinsælum leikjum. Ferðaplanið er fjölbreytt en alls verða sýndar 16 sýningar á 16 stöðum á 16 dögum. Fyrsta sýning verður föstudaginn 9. september og eftir það verður sýnd ein sýning á dag allt til laugardagsins 24. september. Sýndir verða leikirnir Jón Sigurðsson strákur að vestan og Bjarni á Fönix. Báðir leikirnir hafa verið sýndir við frábærar viðtökur en einnig er gaman að geta þess að söguhetjur leikjanna tengjast að öllum líkindum sterkum böndum. En talið er að Jón og Bjarni séu fóstbræður þó ekkert sannað en margt bendir til þess. Sýningarplanið verður birt von bráðar fylgist því vel með.

Vatnsfjarðaævintýr frumsýnt um helgina

Kómedíuleikhúsið frumsýnir nýjan einleik á morgun, laugardag kl.17, í Heydal. Um er að ræða verk þar sem fjallað er um fyrstu 400 árin í sögu Vatnsfjarðar við Djúp. Óhætt er að segja að saga staðarins sé um margt merkileg. Leikurinn hefst í landnámu þar sem sagt er frá þeim mikla smekkmanni er settist fyrstur að í Vatnsfirði. Svo er skautað áfram í tímann og fjallað um Sturlungaárin í fyrðinum en þar kemur við sögu hinn sérstaki kappi Þorvaldur Vatnsfirðingur. Sem var alveg örugglega ekki jafnaðarmaður heldur miklu frekar ójafnaðarmaður. Að lokum er röðin kominn að hinum mikla ævintýramanni Birni Einarssyni sem er betur þekktur undir gælunafninu Jórsalafari. Var hann víðförull mjög, höfðingi og valdsmaður en kunni þó að skemmta sér eigi sjaldnar en þrisvar í viku. Var hann með heila hirð í kringum sig og byggði upp mikið veldi í Vatnsfirði. Björn fór víða um heiminn ásamt eiginkonu sinni Sólveigu en hún var ein víðförlasta kona jarðinnnar á sínum tíma. Vatnsfjarðaævintýr er sérstaklega samið fyrir Inndjúps daga sem verða haldnir í fyrsta sinn núna um helgina í Heydal og víðar í Djúpinu. Má lesa nánar um festivalið hér

http://www.bb.is/Pages/26?NewsID=167789

Þjóðlegu hljóðbækurnar

Þjóðlegu hljóðbækurnar eru sjö og fást í verslunum um land allt. Einnig á heimasíðu Kómedíuleikhússins www.komedia.is undir liðnum Verslun. Sendum um land allt og við borgum sendingarkostnaðinn. Einfalt og þjóðlegt.
Verðið er bara kómískt eða aðeins 1.999.-kr hver hljóðbók.
Þjóðlegu hljóðbækurnar eru:

Þjóðsögur úr Vesturbyggð
Þjóðsögur úr Ísafjarðarbæ
Þjóðsögur úr Bolungarvík
Þjóðsögur af Ströndum
Þjóðsögur frá Súðavík
Þjóðsögur frá Hornströndum og Jökulfjörðum
Bakkabræður og kímnisögur

Act alone hefst á morgun

Leiklistarhátíðin Act alone verður haldin áttunda árið í röð núna um helgina á Ísafirði og í Arnarfirði. Að vanda er aðgangur að öllum sýningum hátíðarinnar ókeypis sem er nú bara einleikið. Fyrsta sýning Act alone 2011 fer fram á Silfurtorgi í miðbæ Ísafjarðar þar sem Prinsessan á Bessastöðum kemur í opinbera heimsókn í bæinn. Eftir það flyst dagskráin yfir í Edinborgarhúsið á Ísafirði þar sem félagar í Leikfélagi Flensborgarskóla sýna úrval stuttra einleikja. Að kvöldi föstudags verða tvær sýningar í boði. Fyrri sýningin kemur frá Noregi og nefnist The Whole Caboodle. Sýningin hefst kl.20 og verður flutt á ensku. Fyrsta degi Act alone 2011 lýkur með nýjasta einleik þjóðarinnar Skjaldbakan kl.22. Á laugardag verða þrjár sýningar í boði. Leikurinn hefst með dansverkinu Kyrrja kl.15. Tveimur tímum síðar veður opin æfing á einleik sem verður frumsýndur í haust og nefnist Hvílíkt snildarverk er maðurinn! Lokasýning laugardagsins er Mamma ég! sem verður kl.21 og eru allar sýningar dagsins í Edinborgarhúsinu. Á lokadegi Act alone flyst dagskráin yfir í Arnarfjörð nánar tiltekið á Hrafnseyri. Þar verða fluttir tveir leikir sem báðir tengjast þessum merka sögustað og höfuðbóli Vestfjarða. Fyrri leikurinn er Bjarni á Fönix sem verður sýndur kl.13.30 í kapellunni á Hrafnseyri. Act alone 2011 lýkur síðan með einleiknum Jón Sigurðsson strákur að vestan. Nánari upplýsingar um dagskrá Act alone má finna á heimasíðu hátíðarinnar www.actalone.net
Nú vita allir hvar þeir verða um helgina. Sjáumst í Einleikjabænum á Act alone 2011.

Kómedíuleikárið 2011 - 2012 á teikniborðinu

Ágúst er jafnan spennandi tími fyrir marga og einkum í leikhúsheiminum. Afhverju? Jú nýtt leikár framundan. Við í Kómedíuleikhúsinu erum nú að undirbúa nýtt Kómískt leikár annó 2011 - 2012. Það verður margt spennandi á döfinni hjá okkur á leikárinu og munum við kynna það hér á Kómedíublogginu í september byrjun. Gaman væri að nefna ný kómísk stykki hér en geymum það um stundarkorn. En við erum hinsvegar ávallt opin fyrir hugmyndum og öllum er velkomið að aðstoða við að móta leikár Kómedíuleikhússins eina atvinnuleikhús Vestfjarða sem sýnir þó um land allt og oft víðar. Eitt er víst það verður sannkölluð Kómedía leikárið 2011 - 2012.

Act alone 12. - 14. ágúst Ísafirði og Arnarfirði

Leiklistarhátíðin Act alone verður haldin áttunda árið í röð dagana 12. – 14. ágúst. Hátíðin fer að vanda fram á Ísafirði sem gárungarnir nefna Einleikjabæinn þegar hátíðin fer fram ár hvert. Eru það orð að sönnu því mikið fjör er í bænum Act alone helgina en auk þess hefur Kómedíuleikhúsið sem einmitt er staðsett í bænum verið duglegt við að setja upp einleiki síðasta áratug. En í ár verður Act alone ekki bara á Ísafirði heldur einnig í Arnarfirði, nánar tiltekið á höfuðbóli Vestfjarða, Hrafnseyri. Rétt er að geta þess að aðgangur að öllum sýningum á Act alone er ókeypis einsog verið hefur frá upphafi. Dagskrá Act alone 2011 er sérlega vönduð og fjölbreytt og náttúrulega einleikin. Boðið verður uppá fjölmarga innlenda leiki og einn erlendan gestaleik. Í gegnum árin hafa margir erlendir einleikarar komið fram á Act alone og að þessu sinni mun sýning frá Noregi verða í aðalhlutverki. Leikurinn nefnist The Whole Caboodle með leikkonunni Sara Margrethe Oskal og er opnunarsýning Act alone í ár. Listakonan er Sami og hefur verið að vinna með eigin sagnarf í sinni list með því að segja frá sögu, hjátrú og fjölbreyttan sagnaarf Sama. Sýningin er á ensku og hefur verið sýnd víða um heim. Átta innlendir einleikir verða á dagskrá Act alone í ár sem sýnir um leið hve öflugt einleikjaformið er á Íslandi í dag. Nýjasti einleikur þjóðarinnar Skjaldbakan með Smára Gunnarssyni verður sýndur á fyrsta degi Act alone og einnig mun prinsessan á Bessastöðum koma í opinbera heimsókn á Ísafjörð. Nemendur í Leikfélagi Flensborgarskóla hafa verið að vinna með einleikjaformið síðustu misseri og munu sýna úrval stuttra einleikja. Á öðrum degi Act alone verða þrír einleikir sýndir og hefst dagurinn með leiknum Beðið eftir gæsinni eftir Ásgeir Hvítaskáld. Ragnheiður Bjarnason sýnir dansverkið Kyrrja og Lilja Katrín Gunnarsdóttir flytur leik sinn Mamma ég!. Einnig verður opin æfing á einleiknum Hvílíkt snildarverk er maðurinn! sem verður frumsýndur í haust með leikaranum Sigurði Skúlasyni. Á lokadegi hátíðarinnar flyst dagskráin yfir á Hrafnseyri í Arnarfirði. Þar verður sýndur sögulegi einleikurinn Bjarni á Fönix og hátíðinni lýkur síðan með einleiknum Jón Sigurðsson strákur að vestan sem var sérstaklega samin í tilefni af 200 ára afmæli þjóðhetjunnar. Dagskrá Act alone 2011 og allar upplýsingar um hátíðina má finna á heimasíðunni www.actalone.net

Dagskrá ACT ALONE 12. - 14. ágúst Ísafirði og Arnarfirði

Ein flottasta listahátíð landsbyggðarinnar ACT ALONE verður haldin áttunda árið í röð dagana 12. - 14. ágúst. Hátíðin fer að vanda fram í Einleikjabænum Ísafirði en einnig verða sýningar á Hrafnseyri í Arnarfirði. Rétt er að taka það sérstaklega fram að aðgangur að öllum sýningum hátíðarinnar er ókeypis. En þannig hefur það reyndar verið allt frá upphafi. Þannig að nú er bara að vippa sér í Einleikjabæinn og njóta einstakrar hátíðar. Hér er dagskrá ACT ALONE:

Dagskrá ACT ALONE 2011
12. – 14. ágúst á Ísafirði og Arnarfirði
Aðgangur að öllum sýningum ACT ALONE er ókeypis

Föstudagur 12. ágúst

Silfurtorg Ísafirði
Kl.15.00 Prinsessan á Bessastöðum: Opinber heimsókn á Ísafirði
Leikari: Þórunn Arna Kristjánsdóttir

Prinsessan er búin að ferðast um allt Ísland með forsetanum í sumar og nú er komið að Ísafirði. En núna er hún búin að týna forsetanum! Hvar gæti hann verið? Ætli hann hafi tjaldað upp í Naustahvilft? Sé að gæða sér á góðgæti í bakaríinu? Eða er hann hreinlega upp í skýjunum? Hjálpið prinsessunni að finna forsetann, dansið og syngið að vild, þetta verða sko fálkaorður og fjör!

Edinborgarhúsið Ísafirði
Kl.17.00 Röð stuttra einleikja
Leikarar: Leikfélag Flensborgar
Leikstjórn: Eyrún Ósk Jónsdóttir, Erna Ómarsdóttir

Leikfélag Flensborgar hefur verið a vinna með einleikjaformið síðasta árið og munu nokkrir meðlimir leikfélagsins sýna einleiki á Act alone. Einleikirnir verða sýndir hver á eftir öðrum og tekur hver sýning 5-10 mínútur. Einleikirnir eru spuna verk, skrifaðir eða stílfærðir af krökkunum sjálfum. Þeir eru mjög mismunandi: grínleikir, harmleikir, abstrakt dans og súríalismi.

Edinborgarhúsið Ísafirði
Kl.20.00 The Whole Caboodle
Leikari/Höfundur: Sara Margrethe Oskal
Sýningartími: 80 mín

Einleikurinn The Whole Caboodle byggir á hinni gömlu hirðfíflahefð. Hirðfíflið grefur upp óþægileg mál, kemur upp um hluti sem þarf að gagnrýna og dregur fram í dagsljósið það sem er hulið. Oskal hefur tekið hefðbundnar gamansögur, sögusagnir og “joiks” (gömul finnsk sönghefð) og skapað úr þeim þrjár nútímapersónur: Maidie, hreindýrið og ömmuna. Þessar persónur eru gæddar miklum tilfinningaþunga og hafa öll mikilvæga sögu að segja. Það hefur verið níðst á þeim og þau niðurlægð en á sviðinu kemur hirðfíflið upp í þeim. Þau byrja í tapliðinu en enda sem sigurvegarar.
Oskal flytur verk sitt á minnihluta tungumálinu, Sami, en hefur þróað með sér þann hæfileika að komast yfir tungumálaþröskuldinn. Eins og töframaður þýðir hún stanslaust, línu fyrir línu, brandara eftir brandara, yoik eftir yoik með hjálp Power Point. Þessi þýðingaraðferð er algerlega samofin sýningunni og er í sjálfu sér orðið listrænt tæki. Það virkar sem galdrar og þeir tilheyra hlutverkum hirðfíflsins. Þannig má segja að þetta nútímalega Sama hirðfífl geti spunnið, haft stjórn á tímasetningum á sviðinu OG haft raunveruleg samskipti við áhorfendur á hvaða tungumáli sem er: Íslensku?

Edinborgarhúsið Ísafirði
Kl.22.00 Skjaldbakan
Leikari: Smári Gunnarsson
Höfundar: Árni Grétar Jóhannsson, Smári Gunnarsson
Leikstjórn: Árni Grétar Jóhannsson
Sýningartími: 55 mín

Skjaldbakan er gamansamur einleikur byggður á þeim sannsögulega stóratburði þegar risaskjaldbaka kom að landi á Hólmavík árið 1963 og upphófst mikið fjölmiðlafár.
Ungur maður kynnist veiðimanninum og þótt þeir fari í sitt hvora áttina þá eru á milli þeirra órjúfanleg tengsl. Veiðimaðurinn tekur loforð af hinum unga manni að passa upp á bát fyrir sig þegar hann flytur frá þorpinu. Þegar báturinn dúkkar upp aftur mörgum árum seinna og minningar um veiðimanninn og skjaldbökuna sem hann dró að landi streyma fram þá koma fram leyndir draumar hins unga manns um veiðimennsku, sjómennsku og almenna karlmennsku. Allt kristallast þetta auðvitað í einu merkasta afreki veiðimannsins, skjaldböku ævintýrinu.

Laugardagur 13. ágúst

Edinborgarhúsið Ísafirði
Kl.14.00 Beðið eftir gæsinni
Leikfélagið Frjálst Orð
Leikari: Jón Gunnar Axelsson
Höfundur/Leikstjórn: Ásgeir Hvítaskáld
Sýningartími: 18 mín

Beðið eftir gæsinni er einleikur eftir Ásgeir Hvítaskáld. Jón leikur örvæntingafulla veiðimanninn sem hræðist mest af öllu að vera kallaður einnar gæsar veiðimaður. En gæsin er slunginn og hefur áhrif á hugarheim veiðimannsins. Bráðfyndið og kaldhæðið.

Edinborgarhúsið Ísafirði
Kl.15.00 Kyrrja
Flytjandi/Hugmyndahöfundur: Ragnheiður Bjarnarson
Höfundur texta: Snæbjörn Brynjarsson
Tónlist: Jóhann Friðgeir Jóhannsson
Lýsing: Stefán Benedikt Vilhelmsson
Sýningartími: 50 mín

Skynjum við litbrigði martraða?
björt sem mjöll
rjóð sem rós
tinnusvört

Komdu á vit ævintýranna -
og ef þú rýnir vel gæturðu séð engla...
Tilgangur verksins er að rannsaka munin á milli góðs og ills.
Kanna hvað hugtökin himnaríki og helvíti standa fyrir og hvort það sé nauðsynlegt að hafa einn heim af hinu góða og annan af hinu illa/vonda.
Er tvískiptur heimur nauðsynlegur til að skilja jafnvægið á milli þeirra?
Eru hinir samfélagslega illu eins vondir og við viljum halda?
Eru þeir illu að reyna að fá okkur til að horfast í augu við okkur sjálf?
Hvað kraumar undir hinu góða yfirborði?
Hvað gerist ef prinsessan deyr?

Edinborgarhúsið Ísafirði
Kl.17.00 Verk í vinnslu – Opin æfing á Shakespeare
Leikari: Sigurður Skúlason
Leikstjórn: Benedikt Árnason
Sýningartími: 90 mín

Í október n.k. verður frumsýndur einleikurinn Hvílíkt snilldarverk er maðurinn! byggður á höfundarverki Williams Shakespeare eftir leikarann Sigurð Skúlason og leikstjórann Benedikt Árnason. Þessi sýning er hugsuð sem þakkaróður til leiklistarinnar og þess besta sem hún hefur af sér alið: verka leikskáldsins Williams Shakespeares.
Sýningin er byggð á brotum úr verkum Shakespeares og fjallar um manninn og vegferð hans frá vöggu til grafar og skyldleika lífs og leikhúss af því innsæi og listfengi sem Shakespeare einum er lagið! – í þýðingu Helga Hálfdanarsonar.

Edinborgarhúsið Ísafirði
Kl.21.00 Mamma, ég
Höfundar: Lilja Katrín Gunnarsdóttir, Svanur Már Snorrason
Leikari: Lilja Katrín Gunnarsdóttir
Framleiðandi/Tæknitröll: Stefán Benedikt Vilhelmsson
Leikstjórn: Ástbjörg Rut Jónsdóttir
Sýningartími: 50 mín

Hér er á ferð gamansamur einleikur eftir nýbakaða móður um meðgöngu, fæðingu og sjálft móðurhlutverkið. Lilja Katrín var með lífið planað. Hún ætlaði aldrei að vera mamma enda miklu skemmtilegra að djamma, djúsa og fara í skemmtistaðasleiki á sóðalegum börum....En lífið henti Lilju út í djúpu laugina eitt vorkvöld í Köben. Hún varð ólétt eftir einnar nætur gaman og eftir miklar hugleiðingar fram og til baka ákvað hún að eignast barnið. Það var hægara sagt en gert. Lilja komst að því að það var ótal margt sem hún hafði ekki hugmynd um um meðgönguna því enginn hafði sagt henni það. Konur tala ekki um gyllinæð, þvagleka, skeggvöxt og bjúg heldur einblína á að meðgangan, fæðing og það að verða mamma sé bara frábært, æðislegt og meiriháttar - sem það er vissulega. En ekki alltaf.
Hér er á ferð einleikur sem allir geta haft gaman að - hvort sem það eru óléttar konur, ömmur, afar, bræður, systur, mömmur, pabbar og allir þeir sem hafa hugleitt barneignir eða þekkja einhvern sem hefur gengið í gegnum þetta ferli.
Komið með í ferðalag um ævintýraheima bleyjuskipta, ungbarna, brjóstagjafar og ælubletta.

Sunnudagur 14. ágúst

Hrafnseyri Arnarfirði
Kl.13.30 Bjarni á Fönix
Kómedíuleikhúsið
Leikari: Ársæll Níelsson
Höfundar: Ársæll Níelsson, Elfar Logi Hannesson
Búningar/Leikmunir: Marsibil G. Kristjánsdóttir
Leikstjórn: Elfar Logi Hannesson
Sýningartími: 40 mín

Skipherrann Bjarni Þorlaugarson á skútunni Fönix háði frækinn bardaga við hátt í 30 Fransmenn um miðja nítjándu öld. Bardaginn stóð yfir í heila fjóra klukkutíma, að vísu tóku menn sér stutta pásu í miðjum átökum, og gekk Bjarni óskaddaður af vettvangi. Skömmu síðar fannst sjórekið lík af einum Fransmanni og voru uppi kenningar um að Bjarni hafi orðið hans bani. Mál var dómtekið og þurfti Bjarni þá að spyrja sig þeirrar samviskuspurningar: Drap ég mann eða drap ég ekki mann? Sagan af Bjarna skipherra á Fönix er sönn vestfirsk hetju og þroskasaga. Í þessu leikriti skiptast á ástir og átök úr íslenskum raunveruleika.
Bjarni á Fönix er kraftmikil sýning sem lætur engan ósnortinn.

Hrafnseyri Arnarfirði
Kl.15.00 Jón Sigurðsson strákur að vestan
Kómedíuleikhúsið
Leikari/Höfundur: Elfar Logi Hannesson
Leikmynd/Búningar: Marsibil G. Kristjánsdóttir
Leikstjórn: Ársæll Níelsson
Sýningartími: 45 mín

Sómi Íslands sverð og skjöldur. Frelsishetjuna Jón Sigurðsson frá Hrafnseyri þekkja allir og þá einkum afrek hans í Danaveldi. En hver var Jón Sigurðsson og hvaðan kom hann? Hvað var það sem mótaði hann og gerði hann að öflugum talsmanni þjóðarinnar? Í þessu verki fáum við að kynnast piltinum Jóni Sigurðssyni og æskuárum hans á Hrafnseyri í Arnarfirði.
Verkið er sérstaklega samið í tilefni af 200 ára afmæli Jóns Sigurðssonar og var frumsýnt á afmælisdegi hans þann 17. júní á Hrafnseyri.

Hátíðarlok – Sjáumst að ári á Act alone 2012 í ágúst