Einstök sýning á Gíslastöðum í Haukadal

Á Gíslastöðum í Haukadal Dýrafirði verður listsýningin Einstök sýning – Listamaðurinn með barnshjartað. Sýningin opnar föstudaginn 1. júlí kl.14 og eftir það verður sýningin opin frá kl.14 – 16 allt til sunnudagsins 24. júlí. Á sýningunni er einstakri myndlist og leiklist gerð skil. Í myndlistinni verða sýndar myndir eftir þrjá vestfirska einfara í íslenskri myndlist. Fyrst ber að nefna Samúel Jónsson í Selárdal sem þekktur er undir viðurrefninu Listamaðurinn með barnshjartað. Einnig verður viðamikil sýning á verkum listahjónanna frá Hofi Dýrafirði þeirra Gunnars Guðmundssonar og Guðmundu Jónu Jónsdóttur. Síðast en síst er sérstök sýning um sögu einleikjalistarinnar á Íslandi. Þetta sérstaka form leiklistarinnar á sér langa og merka sögu hér á landi. Síðustu ár hefur einleikjaformið verið áberandi í vestfirsku leikhúslífi en þar starfar Kómedíuleikhúsið sem hefur sett upp fjölmarga einleiki síðasta áratuginn og einnig er árlega haldin sérstök einleikjahátíð Act alone í Haukadal og Ísafirði. Saga einleikjalistarinnar er sögð á stórum söguspjöldum en einnig eru til sýnis kynningarefni um einleiki á Íslandi s.s. leikskrár sem og handrit einleikja og marskonar einleikin fróðleikur um einleiksformið. Ýmis varningur er til sölu á sýningunni s.s. bókin Einfarar í íslenskri myndlist á ensku, Þjóðlegar hljóðbækur og fjölbreytt handverk frá ömmu og afa barni Listahjónanna á Hofi, Marsbil G. Kristjánsdóttur. Aðgangur að sýningunni er ókeypis.

Athugasemdir

[Ásthildur Cesil Þórðardóttir, 29.6.2011 kl. 20:45]

Spennandi, svo er að vita hvort maður getur tekið sér hlé til að njóta.

[Elfar Logi Hannesson, 30.6.2011 kl. 00:42]

mikið atriði þó við flest ofvirk erum - að gefa sér tíma til að njóta, sjálfur missi ég af alltof mörgu áhugaverðum viðurkenni það fúslega, enda geggjað um að vera í okkar (jákvæð)ofvirka menningar- og mannlífi

[Bergljót Gunnarsdóttir, 30.6.2011 kl. 00:59]

Því miður er ég af óviðráðanlegum ástæðum komin suður, en mun sæta færis þegar ég kem aftur seinnipartinn í júlí. Hamingjuóskir með framtakið og kossar til Billu!

[Elfar Logi Hannesson, 30.6.2011 kl. 13:55]

ávallt velkomin í Haukadalinn - bestu kveðjur til leikskálds þjóðarinnar