3 AUKASÝNINGAR Á HEILSUGÆSLUNA Í ARNARDAL

Hápólitíski gamanleikurinn Heilsugæslan var frumsýndur í Arnardal um helgina fyrir troðfullu húsi og við mjög góðar undirtektir. Fullt var á 2 sýningu og nú þegar er uppselt á næstu tvær sýningar í Arnardal. Því hefur verið ákveðið að vera með 3 aukasýningar í Arnardal. Ein aukasýning verður núna á sunnudag 11. október kl.15. Hinar tvær aukasýningarnar verða viku síðar eða sunnudaginn 18. október kl.15 og kl.19.30. Miðaverð á aukasýningarnar er aðeins 1.900.kr. Hægt verður að kaupa sérstaklega kökur og aðrar léttar veitingar. Miðasala á aukasýningarnar er þegar hafin í síma: 860 6062. Einnig er hægt að senda tölvupóst á netfangið: [e-mail]
Í vikunni verða einnig opnuð útibú Heilsugæslunnar víða um Vestfirði. Þriðjudaginn 6. október verður sýning í Sjóræningjahúsinu á Patró. Daginn eftir verður sýnt á Café Riis á Hólmavík og á fimmtudag 8. október verður sýnt í Félagsheimilinu á Þingeyri. Þessar sýningar hefjast allar kl.20.30 og verður miðasala á staðnum.
Íslendingar hafa löngum státað af besta heilbrigðiskerfi í heimi. Við hrósum okkur yfir háum meðalaldri, þjónustu í hæsta gæðaflokki og frábærum læknum. En er kerfið eins gott og af er látið? Er það hugsanlega farið að vinna gegn tilgangi sínum? Er aukinni eftirspurn sjúkdóma svarað með meira framboði? Hvaða tilgangi þjónar góð heilsa? Metum við líf í magni eða gæðum?
Leikritið, Heilsugæslan, er samið af lækni, Lýð Árnasyni, og gefur áhorfandanum sýn inn í þetta völundarhús og það sem býr að tjaldabaki.
Heilsugæslan er gamanleikur og öll hlutverk í höndum tveggja leikara, þeirra Elfars Loga Hannessonar og Margrétar Sverrisdóttur.
Heilsugæslan er hápólitískt leikrit og umfjöllunarefnið brennandi á íslenzku þjóðfélagi, ekki sízt núna, í skugga niðurskurðar.
Heilsugæslan fyrir alla!

Athugasemdir

[Þórarinn Þ Gíslason (IP-tala skráð) 5.10.2009 kl. 18:08]

Sæll .

Frábært framtak.

Óska ykkur velfarnaðar í leiklistinni,  og ekki síst á þessum sérstaka stað sem Arnardalur er

 og svo er  Grænland í augsýn út djúpið   ( í hillingum) .

Kveðja.

[Elfar Logi Hannesson, 5.10.2009 kl. 18:16]

takk fyrir Þórarinn - hefur alltaf langað til Grænlands læt verða að því einn daginn.....