PÓSTLISTI KÓMEDÍU SJÓÐHEITUR

Það er óhætt að segja að tilkoma Póstlista Kómedíuleikhússins á Kómedíuvefnum www.komedia.is hafi slegið í gegn. Nú gefst gestum og vinum Kómedíu kostur á að fá reglulega Kómedíufréttir og geta því um leið skúbbað soldið og verið fyrst með fréttirnar. Í tilefni af stofnun Póstlista Kómedíu hefur verið blásið til skemmtilegs leiks. 10 heppnir Kómedíuvinir sem skrá sig á Póstlistann fyrir 1. október fá miða fyrir tvo á jólaleikinn vinsæla Jólasveinar Grýlusynir. Dregið verður 3. október. Þannig að nú er bara að skella sér á www.komedia.is gerast áskrifandi að Kómedíufréttum.

FORLEIKUR OG ÍSBJÖRN Á ÍSÓ

Leikár Kómedíuleikhússins er bæði ferskt og klassískt. Alls verða sex sýningar á fjölum leikhússins á nýju leikári. Næstu tvo föstudaga ætlar Kómedíuleikhúsið að fagna komu nýja leikársins með því að bjóða uppá sannkallað Leikhústorg á Silfurtorgi á Ísafirði. Þar verða tveir af vinsælustu einleikjum Kómedíuleikhússins sýndir og er aðgangur ókeypis. Á leikárinu frumsýnir Kómedíuleikhúsið nýjan Íslenskan einleik. Leikurinn nefnist Auðun og ísbjörninn og er byggður á samnefndum Íslendingaþætti sem er án efa sá besti og vandaðasti Íslendingaþátta. Í Auðun og ísbjörninn halda Elfar Logi og Soffía Vagnsdóttir áfram farsælu samstarfi sínu en áður hafa þau unnið að tveimur vinsælum Kómedíuleikjum. Tveir kunnir listamenn vinna einnig að sýningunni en það eru þau Hrólfur Vagnsson sem semur tónlist sérstaklega fyrir uppfærsluna og Marsibil G. Kristjánsdóttir sem gerir leikmynd og búninga. Bæði hafa þau áður unnið fyrir Kómedíuleikhúsið með frábærum árangri. Seinni frumsýning leikársins er Forleikur ’09 sem er samstarfsverkefni við Litla leikklúbbinn á Ísafirði. Hér er á ferðinni fersk og fjörug syrpa af einleikjum. Fjögur verk frá fyrri árum verða einnig í boði á leikárinu. Einleikurinn Pétur og Einar var frumsýndur í sumar við frábærar undirtektir og verður leikurinn sýndur áfram í Einarshúsi í Bolungarvík. Jólasveinar Grýlusynir fara aftur á stjá í lok nóvember og verða á fjölunum bæði fyrir vestan og sunnan. Dimmalimm hefur nú sitt fjórða leikár og verða sýningar um land allt. Síðast en ekki síst verður verðlaunaleikurinn Gísli Súrsson á fjölunum fimmta árið í röð en leikurinn hefur verið sýndur hátt í 200 sinnum. Kómedíuleikhúsið hefur ávallt sinnt einleiknum af mikilli ástríðu og í vetur mun leikhúsið bjóða uppá einleikna leiklestra. Fluttir verða valinkunnir og ókunnir íslenskir einleikir annan hvern mánuð í vetur. Fyrsti leiklesturinn verður í nóvember en þá verður fluttur einleikurinn Knall eftir Jökul Jakobsson en í ár eru 75 ár frá fæðingu leikskáldsins. Áfram með lesturinn því Kómedíuleikhúsið mun halda áfram samstarfi sínu við Safnahúsið á Ísafirði og bjóða mánaðarlega uppá Vestfirska húslestra í vetur. Kómedíuleikhúsið hefur haslað sér völl í hljóðbókaútgáfu og mun á leikárinu gefa út tvær nýjar hljóðbækur en óhætt er að segja að bækurnar hafi slegið í gegn. Act alone leiklistarhátíðin verður haldin í sjötta árið í röð 1. – 5. júlí 2009 og að vanda sér Kómedíuleikhúsið um listræna stjórnun hátíðarinnar. Fjölmargt annað verður í boði hjá Kómedíuleikhúsinu í vetur og því um að gera að fylgjast vel með Kómedíunni á heimasíðu leikhússins www.komedia.is sem er opin allan sólarhringinn! Á heimasíðunni færð þú allar upplýsingar um leikhúsið og sýningar okkar. Þar getur þú keypt miða eða pantað leiksýningu fyrir hópa. Einnig getur þú verslað hljóðbækur og síðast en ekki síst lesið Kómískar fréttir reglulega. Hægt er að gerast áskrifandi að Kómedíufréttum og þá missir þú af engu. Kómedíuleikhúsið verður semsagt á ferð og flugi allt leikárið en að lokum má geta þess að þetta stóra vestfirska leikhús sýnir yfir 120 sýningar á ári bæði hér heima og erlendis.

Hlökkum til að sjá ykkur í leikhúsinu

Jólaleikurinn vinsæli Jólasveinar Grýlusynir verður bæði sýndur fyrir vestan og sunnan.

EINLEIKIÐ VIÐTAL

Það er mikið líf og fjör á heimasíðu Act alone leiklistarhátíðarinnar www.actalone.net . Reglulega eru birtar nýjar greinar um þekkta og óþekkta einleikara innlenda og erlenda. Einleikjaskrá Íslands er uppfærð af miklum krafti enda alltaf verið að setja upp nýja einleiki á Íslandi og svo eru fjölmargir eldri sem vantar inní skránna. Einn vinsælasti liðurinn á Act alone síðunni eru flokkurinn Einleikin viðtöl. Þar eru einleikarar teknir tali um einleikin strauma og stefnur og bara listina og leikhúsið almennt. Nú er komið nýtt Einleikið viðtal á Act alone síðuna. Að þessu sinni er það Pétur Eggerz sem er Á eintali. Pétur er einn af stofnendum Möguleikhússins og hefur verið hörku duglegur í Íslensku leikhúslífi síðustu áratugi. Pétur fer víða í viðtalinu segir m.a. frá fyrstu leikhúsupplifun sinni sem var óhemju sterk og áhrifarík því hann brast í grát þegar Mikki refur birtist á senunni og varð að yfirgefa bygginguna. Stofun Möguleikhússins ber að sjálfsögðu á góma og skannar Pétur sögu leikhússins sem er nú ekki einleikin. Einleikurinn kemur að sjálfsögðu við sögu en Pétur hefur bæði samið, leikstýrt og leikið í einleikjum. Margt fleira ber á góma svo nú er bara að kikka á www.actalone.net og lesa.

Pétur Eggerz er fjórði leikarinn sem er Á eintali en áður hafa Hörður Torfa, Hallveig Thorlacius og Eggert Kaaber setið fyrir svörum hjá Kómedíuleikaranum. Öll Einleiknu viðtölin eru aðgengileg á Act alone síðunni. Semsagt fullt af fróðlegu og skemmtilegu einleiknu lesefni á www.actalone.net

 

PÉTUR OG EINAR Í VÍKINNI Í KVÖLD

Sýningar á einleiknum Pétur og Einar hefjast að nýju í kvöld. Sýnt verður að vanda í Einarshúsi í Bolungarvík, húsi harma og hamingju, og hefst kl.20. Miðapantanir eru í Einarshúsi einnig er hægt að senda tölvupóst á netfangið [e-mail] Í einleiknum Pétur og Einar túlkar Elfar Logi líf og störf þeirra manna sem settu hvað mestan svip á Bolungarvík á miklum uppgangstímum og sveipar sögu þeirra ævintýraljóma. Frumkvöðlarnir Pétur Oddsson og Einar Guðfinnsson voru miklir athafnamenn hvor á sínum tíma og stjórnuðu stórveldum sínum af skörungsskap. Þeir bjuggu báðir í húsi harma og hamingju, Péturshúsi sem síðar var nefnt Einarshús. Í sýningunni leiiða Soffía Vagnsdóttir og Elfar Logi Hannesson saman hesta sinna öðru sinni en á síðasta ári settu þau á svið leikinn Jólasveinar Grýlusynir sem sýnd var við góðan orðstýr í Tjöruhúsinu og verður sýndur aftur fyrir komandi jól. Pétur og Einar var frumsýndur á Sjómannadag í sumar við frábærar undirtektir. Leikurinn var sýndur í allt sumar við fádæma góða aðsókn og í kvöld hefjast sýningar að nýju á verkinu. Framundan eru síðan tvær sýningar í september, 11. og 18. Það er því mikið líf og fjör í leikhúslífinu fyrir vestan og um að gera að skella sér í leikhús á Pétur og Einar. En þess má geta að sýningin í kvöld á Pétri og Einari markar upphaf að nýju leikári Kómedíuleikhússins.

Fjölmargar persónur koma við sögu í Pétri og Einari m.a. þessi sjóari sem hefur fengið sér smá tár milli túra.

 

ÞAÐ ER BARA SPENNANDI LEIKHÚSVETUR FRAMUNDAN

Var að skrolla og kikka á heimasíður kollega leikhúsanna margt spennandi verður á fjölunum í íslensku atvinnuleikhúsi í vetur. Kannski maður skelli sér bara soldið í leikhús þetta leikárið. Það sem mér líst best á og langar að sjá er þetta:

Í Borgó

Ekki erfitt að giska hér því leikhúsið hefur ákveðið að setja á svið hvorki fleiri né færri en 3 einleiki á þessum vetri að sjálfsögðu fangar Kómedían og Act alone þessu sérstaklega kannski fáum við að sjá einhvurja þessa leiki á Act alone 2009. En einleikirnir í Borgó heita.

*Ég heiti Rachel Corrie

*Sannleikurinn um lífið - í sjö hlutum

*Óskar og bleikklædda konan.

Í Þjóðleikhúsinu

*Einar Áskell, með brúðumeistaranum Bernd frá Skíðadal - hef reyndar séð verkið en er alveg til í að sjá það aftur og aftur og aftur - sannkölluð kennslustund fyrir okkur leikarana að fylgjast með Bernd á sviðinu.

*Hart í bak. Eftir uppáhalds íslenska leikskáldið mitt Jökul Jakobsson, að mínu mati og sennilega margra annarra hans besta verk. Löngu komin tími á að setja upp verk eftir Jökul og í raun ættu að vera sýningar á hverju leikári á allavega einu verka hans - eða bara sérstök Jökuls hátíð það væri náttúrulega toppurinn. Væri nú gaman að framkvæma þessa hugmynd einhvern daginn.

*Frida..viva la vida. Nýtt íslenskt verk eftir Brynhildi Guðjóns um listakonuna Fridu, þegar tvær góðar listakonur koma saman hlýtur útkoman að vera spennandi.

Í Hafnarfjarðarleikhúsinu

*Steinar í djúpinu. Samstarfsverkefni við Lab Loka. Nýtt leikhúsverk byggt á verkum Steinars Sigurjóns - hljómar rosa spennandi enda flott verk á ferðinni og úrvalslið í brúnni Rúnar Guðbrands, Guðni Franz, Guðrún Ás, Karl Guðmunds ofl ofl. ´

Hjá LA

*Creature. Eftir og með Kristjáni Ingimars, þarf enga útskýringu maðurinn er bara snillingur.

Já sannarlega flottur listi, ég hlakka til. Allir í leikhús í vetur.

BILLUSTOFA OPNAR Í DAG

Kómedíufrúin, Marsibil G. Kristjánsdóttir, opnar vinnustofu sína Billustofu í dag kl.16 í Túngötu 17. Þar gefur að líta mögnuð verk úr smiðju Billu s.s. pennateikningarnar frægu og nýjasta trompið dúkristur úr Gísla sögu Súrssonar sem eru myndskreytingar við fleygar setningar úr sögunni s.s. Nú falla vötn öll til Dýrafjarðar og fleiri slagarar. Fjölmargt fleira er til sölu og til að kikka á í Billustofu s.s. glæsilegar krítarmyndir, vatnslitamyndir ofl. Einnig eru til sölu hljóðbækur Kómedíuleikhússins og lítið fornbókahorn með allrahanda verkum s.s. ástarsögum, reyfurum að ógleymdu Úrvali og Morgun. Billustofa er í Túngötu 17 og verður opin í dag frá kl.16. - 17. Billustofa verður einnig opin á morgun laugardag frá kl.13 - 15. Rétt er að geta þess að Kómedíufrúin er tæknivædd og er með posa. Það er því gott tækifæri að kaupa sér vanda list eða jafnvel kaupa verk til gjafa og jafnvel versla nokkrar jólagjafir því tíminn líður hratt. Að vanda er boðið uppá kaffi fríkeypis á Billustofu. Loks má geta þess að Billustofa verður opin um næstu helgi á föstudag og laugardag á sama tíma. Um að gera að vippa sér í Billustofu og kikka á vandaða list.

 Ein af pennateikningum Billu.

TVÖFALDUR LISTVIÐBURÐUR

Vá segi bara ekki meir. Las um daginn um fyrirhugaða sýningu Brynhildar og bónda hennar á leikverki um Fridu sem verður í Þjóðleikhúsinu. Hljómaði strax spennandi Frida var náttúrulega algjör snillingur og það er Brynhildur líka þannig að maður er bara orðin spenntur að sjá útkomuna. Og nú bætist við sýning á verkum Fridu í Listó. Þetta verður sannkallað Fridufestival á næsta ári og ég mæti.

Frida í fyrsta sinn á Íslandi

KÓMEDÍAN HELDUR ÁFRAM OG ÁFRAM OG ÁFRAM......

Það er ýmislegt í gangi hjá Kómedíuleikhúsinu þessa dagana og heilmikið framundan. Undirbúningur fyrir komandi leikár er á lokastigi og styttist í að Kómedíuárið 2008 - 2009 verði kynnt en leikárið hefst formlega í næstu viku. Sýningar á nýjasta einleik Kómedíuleikhússins Pétur og Einar hefjast að nýju í næstu viku en leikurinn var sýndur í allt sumar við frábærar undirtektir. Alls verða þrjár sýningar á leiknum í september og bera þær allar uppá fimmtudag. Fyrsta sýning verður fimmtudaginn 4. september kl.20. Miðasala á sýningarnar er þegar hafin. Undirbúningur fyrir næstu hljóðbók er einnig á lokastigi. Handritið er tilbúið næsta skref er upptaka í hljóðveri á Ísafirði í byrjun næsta mánaðar og í október ætti hljóðbókin Þjóðsögur frá Ströndum að fást hér á vefnum sem og um land allt. Undirbúningur fyrir leikferðir vetrarins er einnig í gangi en fyrsta ferðin verður farin í lok september. Þá munu Gísli Súrsson og Dimmalimm heimsækja skóla á norðurlandi og er sala á þeim sýningum nú í fullum gangi og lítur bara vel út. Í október munu sýnignarnar vera á höfuðborgarsvæðinu í tvær vikur þar sem einnig verður sýnt í skólum. Sala á þeim sýningum er einnig hafin og er þegar búið að bóka nokkrar sýningar í borginni. Kómedíuleikarinn hefur því í mörgu að snúast þessa dagana og þetta er ekki allt því einnig þarf að dytta að leikmyndum. Bæði Dimmalimm og Gísli Súrsson hafa notið mikilla vinsælda og farið víða og því þarf að yfirfara þær og gera klárar fyrir komandi vertíð. Semsagt Kómískt æði í gangi og allir kátir.

KÓMÍSKA LEIKÁRIÐ ER Á TEIKNIBORÐINU

Kómedíuleikarinn situr nú og pælar og spegulerar einsog svo oft áður á þessum tíma ársins. Það er nefinilega að bresta á nýtt leikár. Að vanda eru ófáar hugmyndir í gangi og vonandi verða þær flestar framkvæmdar á komandi Kómísku leikári. Það verður nóg um að vera hjá Kómedíuleikhúsinu en aðeins of snemmt að segja hvað það verður, þarf aðeins að teikna þetta betur upp. Allavega verða nokkrir góðkunningjar Kómedíu á fjölunum leikverk frá fyrri árum allt frá fornkappanum vinsæla Gísla til Jólasveina Grýlusona. Nýr Kómískur einleikur verður einnig frumsýndur of snemmt að segja nokkuð til um það er í viðræum við leikstjóra og aðra listamenn sem koma til með að vinna að verkefninu. Hljóðbókaútgáfa Kómedíu heldur áfram bráðlega fer sá Kómíski í hljóðver að taka upp Þjóðsögur af Ströndum sem er væntanleg fyrir áramót í verslanir. Ýmislegt fleira er að hringla í kollinum og kæru blogg kollegar þið megið alveg skjóta á mig einhverjum hugmyndum varðandi leikárið - betur hugsa margir kollar en einn. Jæja best að halda áfram að horfa yfir komandi Kómíska leikárið.

P.s. annars nýkomin úr sumarfríi, ljómandi gott, framundan tvær sýningar á Gísla í vikunni og svo á að skreppa á Hornstrandir um helgina og dvelja smá tíma í Fljótavíkinni

HLJÓÐBÓKIN ÞJÓÐSÖGUR ÚR VESTURBYGGÐ UPPSELD

Kómedíuleikhúsið hefur verið að hasla sér völl í hljóðbókaútgáfu og hefur nú þegar gefið út þrjár slíkar. Óhætt er að segja að hljóðbókum Kómedíuleikhússins hafi verið vel tekið og hefur salan gengið framar öllum vonum. Nú er svo komið að fyrsta hljóðbók Kómedíuleikhússins, Þjóðsögur úr Vesturbyggð, er uppseld hjá útgefanda. Nokkur eintök af hljóðbókinni vinsælu úr Vesturbyggð gætu verið til á hinum fjölmörgu sölustöðum hljóðbókanna t.d. í Eymdunsson búðunum, í Flókalundi og Orkusteini á Ísafirði. Hinar tvær hljóðbækur Kómedíuleikhússins eru hins vegar enn fáanlegar og er hægt að panta þær hér á heimasíðunni. Að lokum má geta þess að nú stendur yfir undirbúningur að fjórðu hljóðbók Kómedíuleikhússins. Enn er leitað í hinn magnaða þjóðsagnaarf og nú verða það Þjóðsögur af Ströndum sem er víðfrægt þjóðsagna svæði trölla, drauga og galdra. Hljóðbókin Þjóðsögur af Ströndum er væntanleg í haust.