GLUGGAGÆGIR LIGGUR Á GLUGGA OG ER AÐ GLÁPA

Gluggagægir kominn af fjöllum og mikið hafði hann það nú gaman í nótt. Ekki bara sport að gefa í skóinn heldur um leið gafst honum einstakt tækifæri til að taka út glugga landsins. Gluggagægir nær heldur betur miklum áfanga í verkinu Jólasveinar Grýlusynir því þar tekst honum loks að útbúa sinn eigin glugga. Gluggagægir hefur sett saman nýja vísu um sig og þar segir frá hans aðaláhugamáli.

GLUGGAGÆGIR

Hér ligg ég einn á glugga og er að glápa

inn til þín og augun í mér rápa

til og frá í augnatóftum mínum

er fylgist ég með ferðum þínum.

Í öllum bænum lát þér ekki bregða

þó þurfi' ég mér á þennan hátt að hegða,

en nafnið mitt er gamli Gluggagægir

að glápa inn um gluggana - það nægir!

BJÚGNAKRÆKIR LEIKUR SÉR AÐ BJÚGUM EINSOG KJÖTKVEÐJUKARL

Bjúgnakrækir kominn til byggða og nú er ein gott að kjötkaupmenn passi uppá bjúgun og pylsurnar. Þetta tvennt er nú uppáhaldsfæða Bjúgnakrækis enda heitir hann ekki Bjúgnakrækir fyrir ekki neitt. Hann hefur svo mikið yndi af þessum mat að hann bæði kelar og leikur við þau einsog kjötkveðjukarl út í löndum. Eða einsog hann segir sjálfur frá í vísunni sinni:

BJÚGNAKRÆKIR

Halló bjúga, loksins náði' ég þér!

Ég skipa þér að koma heim með mér.

Dagana langa

bjúgu ég fanga.

Var búinn' að fela

nú við þau kelaaa....

Læt þau svo leika

um háls og á höndum,

rétt einsog kjötkveðjukarl út í löndum.

Maginn á mér æpir hátt og snjallt:

,,Með glöðu geði ét ég þetta allt!"

 

SKYRGÁMUR HÁMAR Í SIG SKYRIÐ OG LÍTUR ÚT EINSOG TUNNA EFTIR SKYRÁTIÐ

Skyrgámur mættur á svæðið og farinn að spóka sig í bænum. Hann er víst ekki allskostar sáttur við skyrmarkaðinn fílar ekki alveg þetta jarðaberja, karamellu, bananasplitt eða hvað þetta nú allt heitir. Heldur vill hann hafa skyrið einsog hjá Grýlu mömmu en uppskriftin er svohljóðandi: þykkt, súrt og bragðsterkt. Þegar hann kemst í svoddan nokkuð hámar hann í sig og lítur út einsog tunna að skyrmáltið lokinni. Eða einsog hann segir í kvæði sínu:

SKYRGÁMUR

Líttu ' á mig, - ég lít út einsog tunna!

Já - eitt er það sem fáir aðrir kunna:

að tæma aleinn ámu risastóra

sem venjulega dugar fyrir fjóra.

Hún troðfull er af skyri beint frá bænum

ég tæmi'ana til botns í einum grænum.

Svo sit ég bara afvelta og get mig ekki hreyft,

ég veit það bara að þetta hefði Grýla aldrei leyft,

hvort sem skyrið hefði verið gefins eða keypt!

Skyrgámur saddur og mettur eftir alvöru skyr.

HURÐASKELLIR YRKIR OG ELSKAR AÐ HAFA HÁTT

Hurðaskellir er mættur í bæinn og átti nú nokkuð erfiða nótt allavega hér vestra rok og læti. En honum fannst það nú svosem ekki slæmt þar sem hann elskar að hafa hátt og skellir hurðum af stakri list. Hurðaskellir hefur heldur betur skellt hurðum í Tjöruhúsinu á Ísó í jólaleikritinu Jólasveinar Grýlusynir. Hefur það mikil áhrif á gang mála í verkinu en til að komast að því er best að mæta bara í Tjöruhúsið ævintýrahús jólasveinanna og sjá jólastykkið. Næsta sýning er á laugardag 22. desember kl.14.00 og stendur miðasala yfir á heimasíðu Kómedíuleikhússins www.komedia.is Hurðaskellir hefur sett saman skemmtilega vísu um þetta sérstaka áhugamál sitt að skella hurðum:

HURÐASKELLIR

Hurðaskellir heiti ég og elska að hafa hátt.

Ef einhversstaðar sé ég hurð sem stendur uppá gátt,

þá rýk ég til og skelli

með ógnarlegum hvelli,

svo hrekkur þú í kút,

en ég er rokinn út!

Hristist hún á hjörunum,

skelfur þú í spjörunum!

Ha, ha, hæ,

ég skellihlæ

og nægju mína fæ.

Hurðaskellir í ham enda kominn í bæinn og skellir hurðum sem aldrei fyrr.

ASKASLEIKIR YRKIR Á KISTUNNI MEÐAN HANN HREINSAR INNAN ASKINN

Þá er Askasleikir mættur í bæinn til að taka út diska af öllum stærðum sem hafa leist af hendi hlutverk asksins síðustu ár. Hann er hins vegar fastur fyrir og vill ekkert vera að breyta nafni sínu þó fólk sé löngu hætt að borða uppúr öskum. Enda væri það sennilega dáldið hallærislegt að heita kannski Diskasleikir eða Súpudiskasleikir, nei heldur viljum við hafa gamla góða nafnið Askasleikir. Líkt og aðrir bræður hans hefur Askasleikir hent fram stöku enda ekki slæmt að geta hent fram stöku á stöku stað. Þetta hefur Askasleikir að segja:

ASKASLEIKIR

Til eru furðulegustu leikir

það þekki ég sjálfur, Askasleikir.

Ég sit svo sæll á minni kistu

og reyni í fyrstu

að hreinsa innan askinn

áður en hann fer í vaskinn.

Ef ekki dugir fingur

þá er ég nokkuð slingur

og teygi mína tungu endilanga

oní askinn, - restarnar að fanga.

Askasleikir hvergi banginn þó ekki sé lengur í askana látið

POTTASLEIKIR YRKIR MEÐ POTTINN Á HAUSNUM

Pottasleikir mættur á svæðið og sópar að sér pottum til að sleikja þá og hreinsa að innan. Pottasleikir komst í einn stóran pott í nótt og varð úr því mikið ævintýri því hann festi hausinn í pottinum. Þess vegna birtist hér engin mynd af Pottasleiki en vísan hans er svona:

POTTASLEIKIR

Æ, æ, æ,

æ, æ, æ.

Ég hausnum á mér ekki uppúr næ!

En viltu vita hvernig fram fer vinnan?

Ég vinn við það að sleikja pott að innan.

Mín langa breiða tunga gerir gagnið,

því betur sem að meira reynist magnið

af innansleikjunni sem eftir verður

þegar góður pottréttur er gerður!

TÍUNDA SÝNING Á JÓLASVEINAR GRÝLUSYNIR Á MORGUN

Á morgun sunnudag verður tíunda sýning á jólaleikritinu Jólasveinar Grýlusynir og hefst hún kl.14.00. Það er óhætt að segja að Kómísku sveinarnir hafi fengið frábærar viðtökur og hafa nú um fjögur hundruð manns séð leikinn. Ekki amalegt það þar sem sýningarstaðurinn Tjöruhúsið er lítið og sætt leikhús sem tekur tæplega 60 manns í sæti ef vel er raðað. Jólastemmningin hefur sannarlega verið til staðar enda er Tjöruhúsið sannkallað ævintýrahús jólasveinanna en til gamans má geta þess að húsið er rautt sem er nú jólaliturinn í ár og síðustu aldar. Höfundar Jólasveina Grýlusona eru þau Elfar Logi Hannesson og Soffía Vagnsdóttir, hann leikur og hún leikstýrir. Leikmyndahönnum og jólasveinahönnun er í höndum listakonunnar Marsibil G. Kristjánsdóttur. Hrólfur Vagnsson semur tónlist og Jóhann Daníel Daníelsson lýsir ævintýrið upp. Hægt er að panta miða á jólaleikritið Jólasveinar Grýlusynir á heimasíðu leikhússins www.komedia.is

Nútíma unglingspiltur á tali við Stúf.

Ljósmynd: Halldór Sveinbjörnsson.

ÞVÖRUSLEIKIR HENDIR FRAM VÍSU Í UPPHAFI NÆTURVAKTAR

Þvörusleikir kom við hér í túninu heima á ísó og kastaði í hús nýrri vísu.

ÞVÖRUSLEIKIR

Þvörusleikir er nafnið mitt

ég dunda mér reyndar við þetta og hitt.

En mest þykir mér þó gaman

þegar margir koma saman

og elda sér mat í potti,

þá fylgist ég með, - og glotti.

Ég veit þá að mín bíður þvara

sem ég fæ að sleikja, bara

af því ég heiti þvörusleikir.

 Þvörusleikir verður í Tjöruhúsinu á Ísafirði um helgina, endilega kikkið við.

 

STÚFUR YRKIR OG TVISTAR UM LEIÐ

Einn vinsælasti jólasveinn síðari ára er án efa stubburinn Stúfur. Hann tvistaði milli landshorna í alla nótt enda þekktur tvistari já nú þarf Sæmi Rokk að fara að æfa sig. Þó nóttin hafi verið erfið er Stúfur hress og kátur og ætlar hann að mæta í Tjöruhúsið á Ísafirði á morgun, laugardag, og sprella með bræðrum sínum í jólaleikritinu Jólasveinar Grýlusynir. Ekki nóg með það heldur ætlar hann líka að vera í leikhúsinu á sunnudag og hefjast báðar sýningar kl.14.00. Miðasala er á heimasíðu Kómedíu www.komedia.is Stúfur hefur samið nýja vísu og þar kemur margt óvænt í ljós einsog lesa má hér:

STÚFUR

Ég er jólasveinn og heiti Stúfur

og ég er alveg einstaklega ljúfur. 

Ég læt nú ekki mikið á mér bera

en samt er ég þó ýmislegt að gera. 

Þótt ég sé smár er margt mér lagt til lista,

ég kann til dæmis feiknavel að tvista.

Þá beygi ég mig örlítið í hnjánum

og teygi síðan vel úr öllum tánum.  

Um leið og jólatjútt – og tvist ég heyri,

þá tvista ég og allt um kollinn keyri.

Já ég er nú meiri KALLINN! 

Í Grýluhelli heppilegt það er

hversu lítið þar fer fyrir mér.

Ef einhver missir tölu undir borðið

þá beinist næstum alltaf til mín orðið:

,,Stúfur litli viltu hjálpa mér”?

Það er segin saga, - þá undir borð ég fer.

 

GILJAGAUR YRKIR MEÐ KROSSLAGÐA FÆTUR

Giljagaur er kominn í bæinn og hafði í mörg horn að líta í nótt. Það kom sér heldur betur vel í nótt að hann gat notað sinn góða hæfileika að skoppa um einsog gormur einsog hann segir í kvæðinu sínu. Giljagaur er ein af 13 stjörnum jólaleikritsins Jólasveinar Grýlusynir sem sýnt er um helgar á Ísafirði við miklar vinsældir. Næstu sýningar eru á laugardag og sunnudag og hefjast kl.14.00 miðasala er á heimasíðu Kómedíu www.komedia.is Jólasveinastjarnan í dag er Giljagaur og hér kemur vísan hans:

GILJAGAUR

Giljagaur heiti ég

með krosslagða fætur

fætur sem ég hef

hef dásamlegar mætur.

Um gilin ég hoppa

án þess að stoppa,

um fyrnindi og fjöllin,

- heilsa upp á tröllin.

Til bæja ég held

hvert einasta kveld

dagana fyrir jólin

þegar sólin, blessuð sólin

er sest á bak við hólinn.

Giljagaur heiti ég

og er eins og gormur.

Gormur sem snýst

eins og endilangur ormur.

Ferðast í stuði

en stundum þó með puði

upp klungur og kletta

og stundum er að detta.

Til bæja ég held

hvert einasta kveld

dagana fyrir jólin

þegar sólin, blessuð sólin

er sest á bak við hólinn.