LEIKHÚSFÓLK TIL LUKKU MEÐ DAGINN

Alþjóðaleiklistardagurinn er í dag og að venju hefur Leiklistarsamband Íslands fengið leikhúslistamann til að semja ávarp í tilefni dagsins. Að þessu sinni er það hin ástæla leikkona Sigrún Edda Björnsdóttir. Kómedíuleikhúsið óskar ykkur öllum til lukku með daginn og leggur til að við njótum dagsins, ölluheldur kvöldsins í leikhúsinu. Kómedíuleikhúsið er því miður ekki með sýningu í kvöld en æfingar standa nú yfir á nýju íslensku leikverki sem verður frumsýnt 1. apríl næstkomandi. En þá er bara að skunda í eitt af ökkur flottu leikhúsum í kvöld og svo væri sniðugt að vera dugleg að sækja leikhúsið allt árið um kring. Því í leikhúsinu gerast ævintýrin og í leikhúsinu er gaman.

En hér kemur ávarp Sigrúnar Eddu:

 Ávarp í tilefni að Alþjóða leiklistardegi 27. mars 2009. 

Höfundur: Sigrún Edda Björnsdóttir.             

Ágætu leikhúsunnendur.   Hvers vegna viljum við hafa leikhús? Þetta furðulega fyrirbæri sem þó hefur fylgt manninum frá ómunatíð. Í dag, þann 27. mars er Alþjóða leiklistardagurinn. Hann er haldinn hátíðlegur um heim allan í þeim tilgangi að vekja athygli á leiklistinni og mikilvægi hennar í mannlegu samfélagi. Því er vert að staldra við og velta ofangreindri spurningu fyrir sér.   Það fallegasta sem sagt hefur verið um leiklistina og hægt er að taka undir af heilum hug er að löngun mannsins til að leika sé sprottin af þörf hans til tengjast því sem býr innra með öllum mönnum, þessu innra ljósi sem við búum öll yfir og finnum svo sterkt fyrir. Það er vegna þessarar tengingar, þessarar samkenndar sem við getum skapað nýjan veruleika. Veruleika leikhússins. Fátt er eins dýrmætt fyrir leikara og að finna þessa tengingu og taka þátt í leiksýningu sem á erindi við áhorfandann og hreyfir við honum, hvort sem er í gleði eða sorg. Við mannfólkið erum þelið sem draumar spinnast úr, þessir dýrmætu draumar sem eru eins og gullþráður í því margbrotna mynstri sem tilvist okkar mótast af. Þessi þráður kemur fram í skáldskapnum, myndmálinu, tónlistinni og hreyfingunni. Ekkert er leiklistinni óviðkomandi. Hún á að endurspegla tilvist okkar, sameina upplifanir okkar og stuðla að samkennd og skilningi meðal manna.  Í viðleitni sinni til að tjá og spegla veruleikann leitar leiklistin að mismunandi formum. Þess vegna er engin ein tegund leiklistar mikilvægari en önnur.

            Til er gamanleikur, harmleikur, grímuleikur, látbragðsleikur, brúðuleikur, einleikur, trúðleikur. Götuleikhús, kaffileikhús, pólitískt leikhús, stofuleikhús, barnaleikhús, vasaleikhús, útileikhús, skuggaleikhús, lítið leikhús, stórt leikhús, útvarpsleikhús, meira að segja ósýnilegt leikhús. Og áhorfendur hafa dregist að leikhúsinu í gegnum aldirnar, alveg eins og þið gerið hér í (dag) kvöld. Hvers vegna? Jú, við viljum verða fyrir áhrifum. Við viljum hlæja saman, gráta saman, láta hreyfa við hugsunum okkar og hugmyndum. Og í síbreytilegum heimi þar sem hugmyndafræði og áherslur geta kollsteypst á einni nóttu, eins og við þekkjum svo vel einmitt nú, á leikhúsið brýnt erindi. Það er ekki síst á þannig tímum sem við höfum þörf fyrir leikhús og því ber leikhúsið mikla ábyrgð. Leiklist breytir kannski ekki heiminum en við getum öll verið sammála um að í leikhúsi búi leyndur sannleikur sem hjálpar okkur í þeirri viðleitni að skilja líf okkar og viljann til að búa til betri heim.

EINMÁNUÐUR GENGINN Í GARÐ OG EINLEIKIN STEMMNING Á LANDINU ÖLLU

Einmánuður gekk í garð þriðjudaginn 24. mars. Einmánuður er síðasti mánuður vetrar samkvæmt gömlu norrænu tímatali og er sagt að ef fyrsti dagur Einmánuðar sé votur þá sé von á góðu vori. Það er gaman að segja frá því í upphafi Einmánuðar að sjaldan hefur fjörið verið jafn mikið í einleikjalífinu á Íslandi og einmitt í dag. Hver einleikurinn á fætur öðrum er settur á svið og er gaman að sjá hve vegur listarinnar hefur vaxið og dafnað vel hér á landi. Á þessu ári hafa fjölmargir einleikir litið dagsins ljós. Borgarleikhúsið hefur nú þegar sett á svið eina þrjá einleiki og von er á einum til viðbótar áður en leikárinu lýkur. Kómedíuleikhúsið frumsýnir nýjan einleik 1. apríl á Ísafirði og heyrst hefur af einleiknum æfingum í Hafnarfjarðarleikhúsinu. Það má því búast við fjölbreyttri og spennandi Act alone hátíð í ár. Undirbúningur fyrir hátíðina er þegar hafin en hún verður haldin dagana 14. - 16. ágúst í einleikjabænum Ísafirði. Þegar hefur verið gengið frá erlendu sýningum þessa árs. Sýningarnar koma að þessu sinni frá Danmörku og Svíþjóð og verður nánar greint frá þeim síðar. Þessa dagana er svo verið að negla niður íslensku sýningarnar sem verða á Act alone 2009. Í tilefni af öllu þessu einleikna tali og komu Einmánuðar þá er rétt að láta hér eina góða vísu fylgja með í lokin:
Einmánuður minn, minn
gakk þú í bæinn.
Vertu ekki úti í vindinum
vorlangan daginn.

MIÐASALA Á AUÐUN OG ÍSBJÖRNINN HAFIN

Miðvikudaginn 1. apríl frumsýnir Kómedíuleikhúsið nýtt íslenskt leikrit og að vanda er sótt í vestfirskan sagnaarf. Leikurinn nefnist Auðun og ísbjörninn og er byggður Auðunar þætti vestfirzka sem er án efa bestur og vinsælastur allra Íslendingaþátta. Miðasala á Auðun og ísbjörninn er hafin og er bæði hægt að panta miða hér á heimasíðunni eða bjalla í miðasölusímann 891 7025. Frumsýning verður einsog áður var getið miðvikudaginn 1. apríl í Tjöruhúsinu á Ísafirði og hefst leikurinn kl.20. Önnur sýning verður laugardaginn 4. apríl kl.14.
Auðun og ísbjörninn er einleikur einsog flest öll verk Kómedíuleikhússins. Árið 2001 tók Kómedía upp þá stefnu að helga starf sitt einleikjum og var ástæðan einkum sú að leikhúsið er staðsett á Vestfjörðum og þar býr aðeins einn atvinnuleikari og því þótti sjalfgefið að setja upp einleik. Fyrsti einleikurinn sem Kómedía setti á svið var Leikur án orða eftir Samuel Beckett. Síðan þá hefur leikhúsið sett á svið fjölmarga leiki og hafa margir þeirra notið mikilla vinsælda. Ekki verður á neinn hallað að segja að Gísli Súrsson sé vinsælasta sýning Kómedíuleikhússins en leikurinn hefur verið sýndur 191 sinni og fram undan eru fjölmargar sýningar hjá útlaganum. Rétt er þó að geta þess að Gísli Súrsson hverfur brátt endanlega í súrinn því sýningum á leiknum lýkur í ágúst á þessu ári. Af öðrum vinsælum sýningum Kómedíuleikhússins má nefna Dimmalimm sem hefur verið sýnt yfir 70 sinnum um land allt og einnig erlendis. Að lokum má geta þess að Auðun, Gísli og Dimmalimm verða öll á fjölunum á Leikhúspáskum á Ísó sem verður haldin á hinni frábæru Skíðaviku á Ísafirði.

KRAKKAR 1 - 101 ÁRA TIL LUKKU MEÐ ALÞJÓÐLEGA BARNALEIKHÚSDAGINN

Alþjóðlegi barnaleikhúsdagurinn er haldinn ár hvert að frumkvæði ASSITEJ International – alþjóðasamtaka um barna- og unglingaleikhús.  Með samskiptaneti sem tengir saman þúsundir leikhúsa og einstaklinga um allan heim hvetur ASSITEJ leikhúslistamenn sem vinna að leiksýningum fyrir börn og unglinga að slá hvergi af listrænum kröfum í starfi sínu.  ASSITEJ leitast við að sameina ólíka menningarheima og kynþætti í baráttu fyrir friði, jafnrétti, umburðarlyndi og menntun.

Í tilefni af alþjóðlegum leikhúsdegi barna í ár hefur Þórarinn Eldjárn, að beiðni Samtaka um barna- og unglingaleikhús á Íslandi, samið eftirfarandi ávarp.

Ávarp á alþjóðlegum leikhúsdegi barna20. mars 2009

eftir Þórarin Eldjárn

Leikhúsmiði...... 

og leikarar uppi á sviði.

Þar sem allir geta orðið það sem þeir vilja.

Þau æpa, hvísla,  syngja, tala, þylja....

eitthvað sem allir krakkar skilja. 

Fullorðnir verða börn og börnin gömul um stund

Breytist einn í kött og annar í hund.

Leikararnir skemmta,  fræða,  sýna, kanna, kenna...........

Kæti,  læti,  tryllingur og spenna.

Stundum er verið að reyna að ráða gátur 

svo reka sumir upp taugaveiklaðan hlátur

og beint á eftir byrjar í salnum grátur.

Samt er alveg ótrúlega gaman

hvernig allir geta setið þarna saman

og horft á hvað leikararnir eru snarir í snúningum

og í sniðugum búningum.....

Þess vegna er alveg full ástæða til að þakka

að þessi dagur í dag skuli vera frátekinn sem alþjóðlegur leikhúsdagur krakka.

AUKASÝNINGAR Á AUKAVINNU Á ÍSÓ

Alþýðlega leik- og söngskemmtunin Við heimtum aukavinnu hefur sannarlega slegið í gegn. Tvær sýningar voru núna um helgina og var uppselt á báðar sýningarnar þó bætt hefði verið við fleiri sætum en um helgina sáu um 300 manns sýninguna.Það hefur því verið ákveðið að hafa tvær aukasýningar um næstu helgi. Sýnt verður á laugardag 21. febrúar og verður sérstök fjölskyldusýning sem hefst kl.17. En gaman er að segja frá því að mikið Jónasar og Jón Múla æði er nú í Grunnskólanum á Ísafirði en um daginn sáu þau brot úr sýningunni og höfðu svo gaman af að nú er Riggarobb og fleiri slagarar sungnir í öllum frímínútum og nestistímum. Það er því tilvalið að fjölskyldan skelli sér öll saman í leikhús um helgina. Síðar um kvöldið eða kl.21 verður svo önnur sýning á Við heimtum aukavinnu! Miðasala á aukasýningarnar er hafinn og nú er bara að slá inn númerið 618 8269 og panta sér miða.

UPPSELT Á AUKAVINNU Á ÍSÓ Í KVÖLD

Uppselt er á alþýðlegu leik- og söngskemmtunina Við heimtum aukavinnu! í Edinborgarhúsinu á Ísafirði í kvöld. Reyndar var líka uppselt í gærkveldi en verið er að vinna í því að koma á aukasýningum um næstu helgi. Leikurinn hefur fengið frábærar móttökur áhorfenda og geggjaða dóma. Enda er hér á ferðinni vönduð sýning byggð á efni úr smiðju galdrabræðranna Jónasar og Jóns Múla Árnasona. Höfundur leikgerðar og leikstjóri er Kómedíuleikarinn en alls koma um 20 manns að sýningunni.

ALLT AÐ VERÐA UPPSELT Á AUKAVINNU Á ÍSÓ UM HELGINA

Það er óhætt að segja að Tóta, miðasölustjóri LL, hafi haft í nógu að snúast í símanum í vikunni því miðasölusíminn á Aukavinnuna hefur verið rauðglóandi síðustu daga. Nú þegar er orðið uppselt núna á föstudag á Við heimtum aukavinnu í Edinborgarhúsinu á Ísafirði.  Reyndar gott betur en það því bætt var við slatta af aukasætum sem ruku út um leið.  Á laugardag eru aðeins örfá sæti laus. Ekki er eftir neinu að bíða og drífa sig að panta miða á Við heimtum aukavinnu! á laugardag. Miðasölusíminn er 618 8269.

...OG LÓFATAKINU ÆTLAÐI ALDREI AÐ LJÚKA

Alþýðlega leik- og söngskemmtuninin Við heimtum aukavinnu! fær frábæra dóma blaðamanns Bæjarins Besta á Ísafirði, Thelmu Hjaltadóttur. Leikdómurinn er á heimasíðu BB www.bb.is og þar segir m.a.: ,,Skemmtunin var eins og vítamínsprauta í hverfandi skammdeginu, full af gleði, húmor og slögurum sem alþjóð þekkir. Nafn leiksins er sótt í samnefndan slagara og er óhætt að segja að það eigi vel við í dag. Við heimtum aukavinnu hrífur áhorfandann með sér aftur í tímann fyrir tíð pjatts og tískustrauma, útrásarvíkinga og krepputals. Áhorfendur sungu, stöppuðu, klöppuðu og rugguðu sér í takt við lögin og mikil stemmning var í salnum. Leikararnir virtust ekki síður skemmta sér konunglega uppi á sviðinu og óhætt að segja að frumsýningin hafi heppnast vel í alla staði enda stóðu áhorfendur upp í lok sýningar og lófatakinu ætlaði aldrei að ljúka.

Leikgerð og leikstjórn verksins var í höndum Elfars Loga Hannessonar og ætli það sé ekki óhætt að kalla hann vestfirskan Mídas því nánast allt sem þessi þúsundþjalasmiður leiklistarinnar kemur nærri verður að vestfirskri menningarperlu." [e-mail]

Miðasala á næstu sýningar er þegar hafinn í síma 618 8269. Sýnt verður föstudag og laugardag og hefjast sýningarnar kl.21. Sjáumst í leikhúsinu.

UPPSELT Á VIÐ HEIMTUM AUKAVINNU

Í kvöld frumsýnir Litli leikklúbburinn í samstarfi við Kómedíuleikhúsið alþýðlegu leik- og söngskemmtunina Við heimtum aukavinnu. Sýnt verður í Edinborgarhúsinu á Ísafirði og nú þegar er orðið uppselt á frumsýninguna í kvöld. Önnur sýning er á morgun og er laust á þá sýningu, fyrstir panta fyrstir fá. Miðapantanasíminn er 618 8269. Miðaverðið er mjög alþýðlegt eða aðeins 1.900.kr. Við heimtum aukavinnu er sannkölluð leik og söngperla þar sem flutt er úrval úr verkum bræðranna Jónasar og Jóns Múla Árnasona. Hér er á ferðinni hver slagarinn á fætur öðrum nægir þar að nefna klassíkur á borð við Riggarobb, Og þá stundi Mundi, Lífið er lotterí, Klara Klara, Einu sinni á ágústkvöldi. Augun þín blá, ofl ofl ofl ofl ofl. Það ættu því allir að geta sungið með og skemmt sér í Edinborgarhúsinu. Næstu sýningar á Við heimtum aukavinnu verða sem hér segir:

6. feb. kl.21. Frumsýning UPPSELT

7. feb. kl.21. Laus sæti

13. feb. kl.21. Laus sæti

14. feb. kl.21. Laus sæti.

Og allir með: En ég elska hann Jóhann árans......

HAMINGJUÓSKIR FRÁ ATVINNULEIKHÚSINU FYRIR VESTAN

Kómedíuleikhúsið á Ísafirði óskar styrkhöfum til hamingju og hlakkar mikið til að sjá ævintýrin öll lifna á senunni. Gangi ykkur allt í haginn og megi leikhúsgyðjan vera með ykkur.

70 milljónir til atvinnuleikhópa