KÓMEDÍULEIKHÚSIÐ Á FJÁRLÖG

Fjárlaganefnd hefur ákveðið að veita Kómedíuleikhúsinu 1.5 milljónir króna í styrk á fjárlögum 2009. Þetta eru mikil gleðitíðindi einsog gefur að skilja og þakkar Kómedíuleikhúsið kærlega fyrir þennan glæsilega styrk. Þetta er í þriðja sinn sem Kómedíuleikhúsið fær styrk frá Fjárlaganefnd og er þetta mikil viðurkenning á starfi leikhússins. Þessi styrkur kemur sér mjög vel því framundan eru fjölmörg verkefni hjá Kómedíuleikhúsinu. Nú standa yfir æfingar á nýjum einleik, Auðun og ísbjörninn, sem er byggður á Íslendingaþættinum Auðunar þáttur vestfirska. Einnig er ný hljóðbók í burðarliðnum að þessu sinni eru það Þjóðsögur frá Súðavík og mun bókin koma út fyrir páska. Af öðrum Kómískum verkum má nefna söngleikinn Við heimtum aukavinnu sem er samstarfsverkefni við Litla leikklúbbinn, ljóðaleikinn Þorpið sem einnig er samstarfsverkefni að þessu sinni við Ljóðasetur Íslands og í byrjun júní er von hljóðbókinni Skrímslasögur. Þannig að það er nokk ljóst að þessir monnýpeningar komi sér mjög vel í hinum fjölbreyttu verkefnum Kómedíuleikhússins sem framundan eru.

THE HORSEPLAY COMPANY

Kómedíuleikhúsið er aðili í alþjóðlega leikhópnum The Horseplay company. Leikhópurinn var stofnaður árið 1997 af nemendum í The Comedia School í Kaupmannahöfn. Stofnendur komum frá Eistlandi, Finlandi og Íslandi. Að sjálfsögðu átti að sigra heiminn en ekki varð þó mikið úr afrekum þar sem leikararnir fóru flestir aftur til síns heima að vinna við leikhúsin þar. Óhætt er að segja að öllum hafi gengið þokkalega að fóta sig í hinum erfiða en skemmtilega leikhúsheimi. Nú stefnir hinsvegar allt í að Kómedíuvinirnir stíga aftur á bak hestsins og endurvekji The Horseplay Company strax á þessu ári. Þegar er komið uppkast af handriti og fjármögnun er komin af stað. Að öllum líkindum verður sýningin alfarið æfð á Íslandi nánar tiltekið í Haukadal í Dýrafirði, leikhúsi Kómedíuleikhússins. The Horseplay Company er þegar komið á netið með Fésbók síðu og blogg síðu, sjá hér,

http://thehorseplaycompany.blogspot.com/

Já það eru sannarlega spennandi tímar framundan hjá Kómedíuleikhúsinu og víst er að árið byrjar með trompi. Þessa dagana standa yfir æfingar á leik- og söngverkinu Við heimtum aukavinnu sem er samstarfsverkefni Kómedíu við Litla leikklúbbinn. Einnig er nýr einleikur í smíðum er nefnist Auðun og ísbjörninn sem er byggður vinsælasta Íslendingaþættinum Auðunar þáttur vestfirski. Rétt er að geta þess að Kómedíuleikhúsið er að sjálfsögðu komið á Fésbókina og allir geta slegist í hópinn og þannig fylgst vel með ævintýrum Kómedíu.

VIÐ HEIMTUM AUKAVINNU Á ÍSÓ

Æfingar eru hafnar á leik- og söngverkinu Við heimtum aukavinnu. Um er að ræða samstarfsverkefni Kómedíu og Litla leikklúbbsins á Ísafirði. Frumsýnt verður föstudaginn 6. febrúar í Edinborgarhúsinu. Einsog glöggum lesendum hefur kannski dottið í hug þá er hér um að ræða leik sem er byggður á verkum bræðranna Jónasar og Jóns Múla Árnasonar. Leikgerðina gerði Kómedíuleikarinn og inniheldur hún fjölmarga slagara úr smiðju Árnasona. Nægir þar að nefna hittara á borð við Úti er alltaf að snjóa, Klara Klara, Riggarobb, Og þá stundi Mundi, Einu sinni á ágústkvöldi ofl ofl ofl ofl ofl ofl ofl. Já það er hreint ótrúlegt hve þeir bræður voru iðnir við kolann og ekki nóg með það heldur eru nánast öll lögin sungin af þjóðinni reglulega á hinum ýmsum mannamótum. Stór hópur leikara og tónlistarmanna kemur að sýningunni Við heimtum aukavinnu og nú er bara að fara að rifja lögin upp og mæta í Edinborgarhúsið og syngja með. Og allir með: Hann sagði; Lífið er lotterí.................................................................

ÞJÓÐSÖGUR ÚR ÍSAFJARÐARBÆ UPPSELD

Jólahljóðbókasala Kómedíuleikhússins gekk framar öllum vonum. Korter fyrir jól kom fjórða hljóðbókin út Þjóðsögur af Ströndum og var henni dreyft í verslanir um land allt líkt og hinar fyrri. Gaman er að geta þess að Kómísku hljóðbækurnar voru vinsælar í jólapakkann þessi jólin og nú er svo komið að helmingur verkanna er uppseldur. Þar er um að ræða tvær fyrstu hljóðbækurnar Þjóðsögur úr Vesturbyggð og Þjóðsögur úr Ísafjarðarbæ. Hinar tvær eru enn til hjá útgefanda Þjóðsögur úr Bolungarvík og Stranda hljóðbókin. Það gæti þó verið að hægt væri að næla sér í hinar uppseldu hljóðbækur í einhverjum Eymundsson verslunum, þori þó engu að lofa. Kómedía heldur áfram að gefa út þjóðlegar hljóðbækur á komandi ári og núna strax í janúar verður skundað í hljóðver á nýjan leik. Að þessu sinni verða það Þjóðsögur úr Súðavík og má eiga von á þeirri hljóðbók fyrir páska annó 2009. Hljóðbækur Kómedíu fást á heimasíðunni www.komedia.is og munið það er frí heimsending. Einnig fást Kómísku hljóðbækurnar í Eymundsson um land allt og í verslunum víða á Vestfjörðum.
Kómedíuleikhúsið óskar landsmönnum gleðilegs nýs árs með þökk fyrir frábært Kómískt ár.

JÓLASVEINAR GRÝLUSYNIR Í TJÖRUHÚSINU UM HELGINA

Jólaleikritið sívinsæla Jólasveinar Grýlusynir verður sýnt núna um helgina í Tjöruhúsinu á Ísafirði. Sýnt verður á laugardag og sunnudag og hefjast báðar sýningarnar kl.14. Miðasala er í fullum gangi hér á vefnum undir liðnum Kaupa miða. Rétt er að geta þess að þetta eru síðustu sýningar á Jólasveinum Grýlusonum þessi jólin. En þráðurinn verður svo tekinn upp að nýju um næstu jól og verður áfram ferðast um landið og miðinn með leikinn enda hafa viðtökur verið framar öllum vonum. Jólasveinar Grýlusynir voru frumsýndir fyrir síðustu jól og hafa nú verið sýndar 30 sýningar sem telst nokkuð gott þar sem sýningartímabilið er aðeins einn mánuður árlega. Höfundar leikverksins eru þau Elfar Logi Hannesson og Soffía Vagnsdóttir sá fyrrnefndi er einnig leikari og sú síðarnefnda er leikstýra. Höfundur tónlistar er Hrólfur Vagnsson og Marsbil G. Kristjánsdóttir hannaði leikmynd og gerði jólasveinana sem þykja sérlega glæsilegir. Gaman er að geta þessi að þessi sami hópur vinnu nú að nýju leikverki sem verður frumsýnt í byrjun næsta árs. Nánar verður fjallað um verkefnið þegar nær dregur frumsýningu. Nú er bara að skella sér í jólaleikhúsið í Tjörunni og kikka á Jólasveina Grýlusyni um helgina. Kómedíuleikhúsið óskar landsmönnum öllum gleðilegra jóla og þakkar fyrir frábært ár í leikhúsinu á árinu sem er að líða. Hlökkum mikið til að hitta ykkur öll á nýju og spennandi leikhúsári.

BJÚGNAKRÆKIR LEIKUR OG KELAR VIÐ BJÚGUN

Í nótt var Bjúgnakrækir á ferð um landið eftir ársfrí, sagt er að hann hafi komið sérlega vel undan vetri og hafi lætt góðgæti í skó ,,þægra og stilltra barna" einsog segir í kvæðinu. Bjúgnakrækir kemur að sjálfsögðu við sögu í leikritinu Jólasveinar Grýlusynir og þar syngur hann þennan flotta slagara:

BJÚGNAKRÆKIR

Halló bjúga, loksins náði´ég þér!
Ég skipa þér að koma heim með mér.
Dagana langa
bjúgu ég fanga.
Var búinn´að fela
nú við þau kelaaaa…
Læt þau leika
um háls og á höndum,
rétt eins og kjötkveðjukall út í löndum.
Maginn á mér æpir hátt og snjallt:
„með glöðu geði ég ét þetta allt!“

Jólasveinar Grýlusynir verða í Tjöruhúsinu í dag kl.14 örfá sæti laus fyrstir panta fyrstir fá www.komedia.is

SKYRGÁMUR VILL SÚRT SKYR EN EKKI ÞETTA NÝTÍSKU BLÁBERJA-SÚKKULAÐI-BANANASPLITT

Skyrgámur kom til byggða í nótt og læddi góðgæti í skó allra barna á landinu og víðar. Skyrgámi finnst skyr afskaplega gott og áður fyrr stalst hann gjarnan í skyrtunnuna og hámaði í sig þangað til hann stóð á blístri. Skyrgámur er stór og sterkur enda er skyr afar hollt eins og allir vita. Reyndar er hann ekki alveg sáttur við skyrflóruna í dag, eins og fram kemur í jólaleikritinu Jólasveinar Grýlusynir. Hann fílar ekki karamellu-, jarðaberja- eða súkkulaðimintuskyr heldur vill hafa skyrið einsog í gamla daga, þykkt, súrt og bragðsterkt og mikið af því. Útlitið er líka í stíl við matarvenjurnar því hann lítur út einsog tunna eða einsog hann segir sjálfur frá í vísunni sem er að finna í leikritinu:

SKYRGÁMUR

Líttu' á mig, - ég lít út einsog tunna!
Já - eitt er það sem fáir aðrir kunna:
að tæma aleinn ámu risastóra
sem venjulega dugar fyrir fjóra.
Hún troðfull er af skyri beint frá bænum
ég tæmi'ana til botns í einum grænum.
Svo sit ég bara afvelta og get mig ekki hreyft,
ég veit það bara að þetta hefði Grýla aldrei leyft,
hvort sem skyrið hefði verið gefins eða keypt!
Skyrrrrrrr
Skyrrrrrrr
Skyrrrrrr

Jólasveinar Grýlusynir verða sýndir í Tjöruhúsinu núna um helgina á laugardag og sunnudag og hefjast sýningarnar kl.14. Miðasala á www.komedia.is

JÓLAGETRAUN KÓMEDÍU - NÚ GETUR ÞÚ UNNIÐ MIÐA Á JÓLASVEINA GRÝLUSYNI

Kómedíuleikhúsið hefur hrint af stað getraun í tilefni jólanna. Svara þarf laufléttri spurningu úr jólaleikritinu Jólasveinar Grýlusynir sem nú er verið að sýna annað árið í röð í Tjöruhúsinu í Neðstakaupstað á Ísafirði. Spurningin hljóðar svo:

Hvaða jólasveinn festir höfuðið ofan í potti í leikritinu Jólasveinar Grýlusynir?

Dregið verður úr réttum svörum og fá fimm heppnir vinna tvo miða á Jólasveina Grýlusyni laugardaginn 27. desember kl. 14 í Tjöruhúsinu. Svörin skal senda á netfangið

[e-mail]

 

ASKASLEIKIR HREINSAR ASKINN ÁÐUR EN HANN FER Í VASKINN

Askasleikir er kominn til mannabyggða eftir gott sumarfrí. Í leikritinu Jólasveinar Grýlusynir fer Askasleikir á kostum ásamt tvíburabróður sínum Bjúgnakræki. Að sjálfsögðu syngur hann um uppáhaldið sitt askana einsog lesa má um hér:

Til eru furðulegustu leikir

það þekki ég sjálfur, Askaleikir.

Ég sit svo sæll á minni kistu

og reyni í fyrstu

að hreinsa innan askinn

áður en hann fer í vaskinn.

Ef ekki dugir fingur

þá er ég nokkuð slingur

og teygi mína tungu endilanga

oní askinn, - restarnar að fanga.

Leikritið Jólasveinar Grýlusynir verður sýnt um helgina í Tjöruhúsinu á Ísafirði. Miðasala á

www.komedia.is

ÆÆÆ POTTASLEIKIR FESTI HAUSINN Í POTTINUM EINN GANGINN ENN

Þá er Pottasleikir komin af fjöllum. Kappinn sá lendir heldur betur í klandri í leikritinu Jólasveinar Grýlusynir. Einsog margir vita elskar hann potta en það vill nú ekki betur til en svo að þeir bræður hann og Gáttaþefur rífast um pottinn sem endar með því að Pottasleikir fær pottinn yfir höfuðið og situr þar fastur. Og þá syngur Pottasleikir:

Æ, Æ, Æ,

ég hausnum á mér ekki uppúr næ!

En viltu vita hvernig fram fer vinnan?

Ég vinn við það að sleikja pott að innan.

Mín langa breiða tunga gerir gagnið,

því betur sem að meira reynist magnið

af innansleikjunni sem eftir verður

þegar góður pottréttur er gerður!

 

Þeir sem vilja heyra allt ævintýrið vippa sér bara í Tjöruhúsið um helgina en leikurinn verður sýndur laugardag og sunnudag og hefjast sýningarnar kl.14. Miðasala á www.komedia.is