AUSTRIÐ HEILLAR

Kómedíuleikhúsið er nú komið á austurland eftir velheppnaða ferð um norðurland. Í dag var sýning mitt á milli fjórðungana eða á Þórshöfn þar fór Dimmalimm mikinn í félagsheimilinu við góðar undirtektir en um 100 áhorfendur voru á sýningunni. Stefnan var nú tekin á Neskaupstað og er það nú nokkur bíltúr að fara frá Þórshöfn en skemmtileg leið. Því miður sáust engin hreindýr á rúntinum í dag enda var nú frekar vetrarlegt á fjöllum, eiginlega leist nú Kómedíuleikaranum ekkert á blikuna stundum enda á sumardekkjunum og á heiðin frá Vopnafirði sem heitir nú sennilega Vopnafjarðarheiði samt ekki viss, var bara skafrenningur og moksturstæki á ferð. En engin hreindýr og heldur engin þoka, gleymdi nú að nefna hana en kannski er bara allt of kalt fyrir svoddan. Þessi heiði var líka fjarska löng og virtist engan enga taka enda var nú svosem ekki farið hratt yfir sökum vetrarfærðar. En niður komst Kómedíuvagninn í gegnum Egilsstaði, Reyðarfjörð og þarf vart að taka fram hvað vakti athygli þar. Jú álið þetta eru rosalega stórar byggingar maður vá og bara allt í kringum þetta er svo stórt. Svo var komið á Eskifjörð og loks upp Oddskarð þetta er nú ekkert smá fjall og göngin sem kend eru við Odd eru nú frekar mjó verður maður að viðurkenna. En í gegn komst Kómedíuvagninn og fékk vænan þvott á bílaplaninu á Neskaupsstað eftir afrek dagsins. Á morgun verður síðan Gísli Súrsson á fjölunum í Verkmenntaskóla Austurlands. Næstu daga verður Kómedía svo á ferðinni um austurland á miðvikudag á Reyðarfirði, fimmtudag á Eskifirði og austurlandsleiknum líkur síðan á Egilsstöðum á föstudag. Mynd dagsins er úr myndasafni Kómedíuleikhússins og er tekin af ónefndum áhorfenda á sögufrægri sýningu á Gísla Súrssyni eða í Geirþjófsfirði, rétt fyrir neðan Einhamar þar sem Gísli lauk sinni æfi, sumarið 2006.

Risi og skíðastökkpallur

Í gær lauk leikferð Kómedíuleikhússins um Norðurland en alls voru sýndar 8 leiksýningar á 5 dögum og er Kómedían þakklát fyrir góðar viðtökur á öllum stöðum. Loka sýningin var í leikskólanum Álfasteini þar sem nornin Bauja fór á kostum í ævintýrinu um Dimmalimm. Reyndar varð nú smá span á leikhúsinu þann morgunin. Að vanda var Kómedíuleikarinn mættur 50 mín. fyrir sýningu en það tekur alltaf nokkurn tima að bera leikmyndina inn, stilla henni upp, setja upp ljós og svona, og áfangastaðurinn stóð bókaður Grunnskólinn Þelamörk. En ops eitthvað hafði það skolast til í bókhaldinu því sýningin átti að vera í leikskólanum í þeirri góðu sveit en ekki í grunnskólanum. Vorum við því búin að aka fram hjá þeim ágæta skóla því hann er eiginlega á Akureyri eða rétt hjá Húsasmiðjunni´(hvað er maður nú að skrifa það hér leikhúsið fær reyndar smá afslátt hjá þeim en bara 8% en jæja þetta lýsir staðháttum best). Leikarinn stóð þá einsog svo oft áður einsog álfur út úr hól en skundaði af stað í leikskólann Álfastein. Þegar þangað var komið var hálftími í sýningu og sjaldan hefur leikarinn verið jafn snöggur að gera allt klárt því tveimur mínútum áður en sýningin átti að hefjast kl.9.43 var allt tilbúið og kl.9.45 hófst sýningin einsog planað var. Allt samkvæmt áætlun einsog einhver sagði í frægu leikriti man ekki hverju jú var það ekki Kardóbærinn eða hitt Egner stykkið, skiptir ekki. Sýningunni var vel tekið á Álfasteini og ekki spillti að fá gómsæta klatta og gott kaffi á eftir, takk fyrir okkur. Stefnan var nú tekin á Siglufjörð þar sem Kómedíuleikarinn ætlar að vera yfir helgina hjá Tóta bróður. Það tekur nú smá tíma að aka á Sigló frá Akueyri en margt að sjá. Ók í gegnum Dalvík þar sem Jóhanni risa Péturssyni er gerð skil með stóru skylti þar rétt hjá Byggðasafni bæjarins. Margt skemmtilegt að sjá á Dalvík, lítill og sætur gosbrunnur og kirkjan er líka flott. Þarna er líka kaffihús en eitthvað er nú rólegt þar yfir vetratímann því það var bara hægt að fá kaffi eða hádegismat ekkert kruðerí enda engin þörf á því í kuldanum.  Næsti áfangastaður Ólafsfjörður. Alltaf er nú jafnskrítið að sjá þennan skíðastökkpall þarna í bænum en samt er þetta mjög skemmtilega absúrd eitthvað. Svo vekur sérstaka athygli þessi flottu bjálkahús við enda bæjarins, væri alveg til í að leigja svona hús í einhvern tíma og njóta lífsins. Láheiðin tók svo við, svo göng strákanna og sídarbærinn Sigló. Á morgun, sunnudag, leggur Kómedíuleikhúsið svo af stað austur á firði. Fyrsti áfangastaður er Þórshöfn og verður Dimmalimm á fjölunum í Félagsheimilinu kl. 10.

Mynd dagsins er tekin á einhverri skólasýningu á Gísla Súrssyni, svaka fílingur í Kómedíuleikaranum.

BESTA BÚLLAN Á AKUREYRI

Í morgun sýndi Kómedía tvær sýningar á Gísla Súrssyni í Brekkuskóla á Akureyri. Áhorfendur skemmtu sér sérlega vel og alltaf er maður nú jafnkátur þegar það gerist. Ég meina það er nú ekkert auðvelt að þurfa að fara að horfa á einhverja leiksýningu kl. korter í níu að morgni og hvað þá eitthvað sem er byggt á þúsund ára gamalli sögu. En sem betur fer sofnaði engin því gestir voru vel með á nótunum og hláturinn dundi þegar Ingjaldsfíflið og fleiri kappar stigu á stokk. Að lokinni sýningu var farið í laugina lesist pottinn. Var leikarinn þá orðin nokkuð svangur og skellti sér á Hamborgarabúlluna, sem hefur lengi verið stefnt að skoða. Svona er máttur auglýsinganna en þessi ágæti staður er mjög duglegur í þeirri deildinni. JPV kallinn var eimitt að tala um auglýsinga málin í Kiljan þættinum í gær og það að þó að maður auglýsi mikið þá verði að vera varið í innihaldið líka. Alveg sammála allavega eftir heimsóknina á Hamborgabúlluna á Akureyri minnir mann reyndar mikið á Tommaborgara, hvernig skyldi standa á því. Penninn hér á Akureyri er komið með þetta fína bókakaffi og þar er gott að tylla sér enda úrvals gott kaffi sérrílagi Latte. Framundan er síðan bara huggulegheit í höfuðstað norðurlands, rölta Listagilið og soddan nokkuð. Næsta sýning og sú síðasta hér fyrir norðan er síðan í fyrramálið. Þá verður Dimmalimm í Þelamerkurskóla. Síðan liggur leiðin austur á firði.  Ha? ER ÞETTA GÍSLI Á UPPSÖLUM. P.s. svona í tilefni skemmtilegs dags læt ég hér fylgja mynd sem Pétur Eggerz, leikstjóri og Möguleikhússtjóri, félagi minn tók af mér þegar við vorum að vinna að einleiknum Skrímsli vestur á Bíldudal. Skelltum okkur í Selárdal einn daginn og fórum m.a. á Uppsali þar sem einbúinn Gísli bjói. Þessi mynd er tekinn inní húsinu en það stendur opið og óvarið. Þyrfti nú að fara að huga að því allavega loka fyrir glugga og soddan þó það þurfi nú ekkert endilega að gera safn sem virðist vera aðalæðið í dag. En þeir sem hafa séð myndina hafa nú verið að velta fyrir sér hvort Kómedíuleikarinn ætli nú að fara að búa til einleik um einbúann Gísla - þeir eru allavega ekkert ósvipaðir segja margir. Segjum ekkert til um þetta að sinni en hugmyndin er góð.

KÓMEDÍULEIKHÚSINU VEL TEKIÐ Á NORÐURLANDI

Það er óhætt að segja að Kómedíuleikhúsinu hafi verið vel tekið í upphafi leikferðar um landið. Næstu tvær vikurnar verður leikhúsið á ferðinni um norður- og austuland með leikina Dimmalimm og Gísla Súrsson. Dimmalimm hóf leikinn á mánudag í Grunnskóla Siglufjarðar þar var sannkölluð ævintýrastemning og krakkarnir á Sigló tóku vel undir. Daginn eftir var Dimmalimm í svaka stuði en leikurinn var þá sýndur 3 sinnum. Tvær sýningar voru á Hvammstanga fyrir leik- og grunnskólann. Sýnt var í safnaðarheimilinu sem breyttist í flott leikhús meðan ævintýrið fór fram. Dimmalimm brunaði svo á Borðeyri og sýndi fyrir nemendur þar. Grunnskólinn á Borðeyri er með þetta flotta svið og aðstöðu sem er alveg til fyrirmyndar. Að lokinni sýningu var leikaranum svo boðið í kaffi og kökur ekki amalegt eftir ævintýralegan dag. Frá Borðeyri lá leiðin til Akureyrar og nú er Dimmalimm komin í smá pásu og útlaginn Gísli Súri tekur við. Gísli Súrsson var sýndur í morgun í Brekkuskóla og óhætt að segja að áhorfendur hafi semmt sér vel ekki síður en leikarinn. Rétt er að geta þess að þetta var 152 sýning á Gísla Súra og telst það nú nokkuð gott. Á morgun verður Gísli Súrsson aftur á fjölunum í Brekkuskóla og verður sýndur tvívegis. Öll aðstaða í Brekkuskóla er til fyrirmyndar, stórt og mikið svið, ljós og alles mjög vandað allt saman. Já við megum ekki gleyma að nefna allt það góða sem við höfum. Á föstudag vaknar Dimmalimm úr dvalanum og verður á fjölunum í Þelamerkurskóla. Kómedíuleikarinn ætlar að drekka í sig norðlenska menningu meðan á dvölinni stendur og að sjálfsögðu verður líka kíkt í sundlaugina góðu og þá sérstaklega heita pottinn.

KÓMEDÍULEIKHÚSIÐ Á FERÐ UM LANDIÐ

Í dag hófst leikferð Kómedíuleikhússins um landið með sýningu á Dimmalimm á Siglufirði. Markar hún upphaf á hringferð Komedíu sem stendur næsta mánuðinn. Í þessari viku verður Kómedíuleikhúsið á norðurlandi og sýnir vítt og breytt eða allt frá Borðeyri til Akureyrar með leikina Dimmalimm og Gísla Súrsson. Í næstu viku verða Gísli og Dimmalimm á Austurlandi og ber þeim m.a. niður á Neskaupstað, Þórshöfn, Eskifirði og Reyðarfirði. Þaðan liggur leiðin til höfuðborgarinnar þar sem sýndir verða leikirnir Skrímsli og Gísli Súrsson. Sýningar í Reykjavík standa yfir frá 1. -12. október.